Ngororero: Umugabo yafatanywe  metero zirenga 1000 z’intsinga z’amashanyarazi za EUCL

Polisi y’u Rwanda mu karere ka Ngororero ku itariki 3 Ugushyingo uyu mwaka yafatanye Sebugirigiri Desiré intsinga z’amashanyarazi za Sosiyete ishinzwe gukwirakwiza ingufu z’amashanyarazi (Energy Utility Corporation Limited (EUCL)) zireshya na metero zirenga 1 000.

Learn how to Thrive

Umuyobozi wa Polisi muri aka karere, Senior Superintendent of Police (SSP) Marc Gasangwa yavuze ko uyu mugabo w’imyaka 58 y’amavuko yafatiwe mu kagari ka Kabaya, Umurenge wa Kabaya ku bufatanye bwa Polisi na EUCL azipakiye mu modoka ifite pulake RAB 012 S yari itwawe n’umugabo Polisi itashatse gutangaza amazina ye kubera ko iperereza ry’ibanze ryagaragaje ko nta ruhare yagize mu iyibwa ryazo.

SSP Gasangwa yavuze ko uyu ukekwaho ubu bujura afungiwe kuri Sitasiyo ya Polisi ya Kabaya; ndetse n’izo ntsinga akaba ari ho ziri mu gihe iperereza rikomeje kugira ngo hamenyekane aho zibwe n’ababikoze.

Yagize ati,"Mu minsi ishize EUCL, Ishami rya Ngororero yatanze ikirego ko yibwe instinga. Tumaze kubimenyeshwa twatangiye gushaka abazibye kugeza dufatanye uriya mugabo ziriya zireshya na metero zisaga 1 000; ariko ibikorwa byo gushaka no gufata abandi bafatanyije na we (niba bahari) birakomeje."

Mu butumwa bwe SSP Gasangwa yagize ati,"Ibikorwa remezo bifitiye akamaro abaturage n’Igihugu muri rusange. Kubyangiza cyangwa kubyiba bigira ingaruka ku iterambere muri rusange. Ni yo mpamvu buri wese agomba kugira uruhare mu kubirinda no kubibungabunga, kandi agatanga amakuru yerekeye ababyangiza."

Yasabye abatuye aka karere gukora neza amarondo kugira ngo bakumire ibyaha birimo ibikorwa nijoro nk’ubujura banafate abiba n’abakora ibindi byaha.

Ingingo ya 406 yo mu gitabo cy’amategeko ahana ibyaha mu Rwanda ivuga ko umuntu wese ku bushake, usenya cyangwa wonona, ku buryo ubwo ari bwo bwose, burundu cyangwa igice kimwe, amazu, amateme, ingomero, impombo z’amazi n’inzira yazo, imihanda, inzira za gari ya moshi cyangwa ibikoresho ibyo ari byo byose by’itumanaho cyangwa by’ingufu z’amashanyarazi, amariba cyangwa izindi nyubako zose bitari ibye, ahanishwa igifungo kuva ku myaka ibiri (2) kugeza ku myaka itanu (5) n’ihazabu y’amafaranga yikubye inshuro kuva kuri ebyiri (2) kugeza ku nshuro icumi (10) z’agaciro k’ibyangijwe.


Travel for Free!


Tanga igitekerezo kuri iyi nkuru



Igitekerezo