Ndasaba kurekurwa nkajya kwita ku muryango wange mbereye Moteur- Gacinya Chance Dennis

Nyuma yuko kuri uyu wa kane tariki ya 28 Ukuboza 2017, Gacinya Chance Dennis, umuyobozi wungirije wa Rayon sports akaba na rwiyemezamirimo, agejejwe imbere y’urukiko rw’Ibanze Rwa Nyarugunga akurikiranwaho ibyaha bitatu birimo kubeshya uwo mugiranye amasezerano mu bijyanye n’isoko ry’ibikorwa remezo kompanyi MICON ahagarariye yagiranye n’ubuyobozi bw’Akarere ka Rusizi, yasabye urukiko ko yarekurwa akazakurikiranwa ari hanze kuko afite umuryango agomba kwitaho anabereye Moteur ndetse n’umugore we akaba nta kazi afite.

Ubushinjacyaha bukurikiranyeho Gacinya Dennis kwishyuza amafaranga atangana n’ibikorwa yakoze kuko amasezerano yari aya miliyoni 636 akaza kwishyurwa miliyoni 495 kandi imirimo yakoze ari 80% ndetse ngo n’ibikoresho yazanye bitujuje ubuziranenge nk’amapoto (poteaux) yari agoramye.

Umushinjacyaha agendere kuri raporo z’umugenzuzi mukuru w’imari ya Leta za 2014-2015 n’iya 2015-2016 ngo zigaragaza Ko Gacinya yahombeje Leta amafranga menshi muri iri soko kuko nyuma y’aya makosa aregwa ngo isoko ryahawe ingabo zavuye ku rugerero ‘reserve force’ zishyuwe 338 487 470 Frw.

Ubushinjacyaha bukavuga Ko iki ari igihombo Gacinya yateje Leta bikagira ingaruka ku baturage bagombaga kungukira muri ibi bikorwa no ku bukungu bw’igihugu.

Umushinjacyaha avuga Ko ibyagezweho mu iperereza na raporo z’umugenzuzi w’imari n’iya REG ishami rya Rusizi zigaragaza impamvu zikomeye zituma uregwa akekwa ko yakoze ibyo aregwa, amusabira gufungwa by’agateganyo iminsi 30.

Gacinya uhakana ibyaha byose aregwa, avuga ko ahubwo na we yareze akarere mu rukiko rw’ubucuruzi Rwa Huye kuko kamwishyuye amafaranga make atajyanye n’ibyo yagakoreye.

Uyu mugabo warezwe nk’uhagarariye kompanyi ya MICON, avuga ko amakosa yose ashingiye ku buyobozi bw’akarere kuko bwamwokeje igitutu mu bikorwa yagombaga kubakorera ngo kuko bashaka kubona ibyo bamurika mu mihigo.

Ngo uku gukorera ku gitutu byatumye hari byinshi bakora bitari biri mu masezerano nko gushaka ubutaka transformers z’amashanyarazi n’ubutaka bwo kubaka aho zagombaga kujya.

Mu masezerano hari harimo ko agomba kuzanira akarere amapoto (poteaux) 830 ariko mu gupima imihanda yagombaga kujyaho, basanze hakenewe 685 bigatuma hashakwa ahandi hagomba kujya asaguka.

Gacinya wanyuze mu miterere y’iri soko yagiranye n’akarere ka Rusizi, avuga ko uretse ahashingwaga amapoto ariko ibindi bikoresho byose byaturukaga hanze bigaca muri MAGERWA bikanapimwa ubuziranenge.

We avuga ko yishyuwe miliyoni 460 Frw (ubushinjacyaha buvuga miliyoni 495), akavuga ko niba koko yarakoze imirimo kugeza kuri 80%, aya mafaranga yishyuwe ntaho yaba ahuriye n’ibikorwa yakoze.

Ati “Ntabwo akarere kanyishyuye amafaranga y’ibyo ntakoze.”

Yasabye kurekurwa agakurikiranwa ari hanze, ngo kuko igihe cyose Ubushinjacyaha bwamukineraga bwamubonaga bityo ko adashobora gutoroka ubutabera.

Avuga kandi ko atuye, afite umugore n’abana agomba kwitaho. Ati “Mfite address, mfite urugo ni nanjye moteur warwo kuko madamu nta kazi afite.”

Gacinya kandi akurikiranyweho icyaha cyo gukora no gukoresha inyandiko mpimbano, icyo kuba ikitso no gutanga inyungu.

Imyanzuro ku ifunga n’ifungurwa by’agateganyo izasomwa tariki ya 03 Mutarama 2018.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
Peter Kuya 30-12-2017

Bamufungure !Kukotwatanga ingero zabo bafunguye ngo bajye kwita ku miryango yabo ;abayobozi ba ADEPR (Tom Rwagasana na bagenzi be)mu gihe bashinjwaga miliyari3 hari n’ibimenyetso