Mugisha wishe umugore we Pasiteri Maggie amunize yakatiwe gufungwa burundu

Urukiko rwisumbuye rwa Nyarugenge rwakatiye igifungo cya burundu Mugisha Drake rumuhamije icyaha cyo kwica umugore we Pastor Mutesi Maggie amunize wayoboraga Itorero ’Gates of Heaven Ministries’, Amarembo y’Ijuru.

Kuri uyu wa Gatatu tariki ya 21 Werurwe 2018 nibwo hasomwe imyanzuro y’urubanza Mugisha Drake yaregwagamo kwivugana umugore we Pastor Maggie, urukiko rukaba rwanzuye ko icyo cyaha kimuhama maze rumuhanisha igihano cyo gufungwa burundu.

Pasiteri Maggie Mutesi wayoboraga Itorero ’Gates of Heaven Ministries’, Amarembo y’Ijuru, yapfuye tariki 10 Nzeri 2017 maze umugabo we Mugisha atabwa muri yombi ashinjwa kugira uruhare mu rupfu rwe.

Urukiko rugaragaza ko gukatira Mugisha iki gihano, rwashingiye kuri raporo yaturutse kwa muganga, aho yagaragazaga ko Pastor Maggie atishwe n’uburwayi ko ahubwo ibizamini byakorewe umurambo we, yasanganywe ibikomere mu mutwe , afite amaraso mu bwonko ndetse amagufwa ye yajanjaguritse.

Uretse ibi kandi ngo ibizamini byerekanaga ko basanze mu ijosi hari ibikomere by’inzara bigaragarira amaso ; ijosi rinagana ku buryo budasanzwe hanaretsemo amaraso ; mu muhogo harimo amaraso nta guhumeka ; urubavu rw’ibumoso rwari rwavunitse n’umutima wicaye mu kiziba cy’amaraso.

PNG - 600.3 ko
Ibizamini byo kwa muganga byerekanye ko nyakwigendera Pastor Mutesi Maggie yishwe anizwe


Mu iburanishwa ry’uru rubanza kandi hanagaragajwe ko Mugisha Drake n’umugore we Pastor Maggie Mutesi batari babanye neza, ngo kuko mu rugo hahoragamo amakimbirane ya hato na hato, ibintu nabyo byashingiweho mu kumuhamya iki cyaha.

Urukiko rwanategetse ko Mugisha agomba kuzishyura ihazabu y’amafaranga y’u Rwanda miliyoni imwe , agahabwa musaza wa nyakwigendera, nk’indishyi y’akababaro.

PNG - 677.6 ko
Pasiteri Maggie Mutesi wari Umushumba w’Itorero ’Gates of Heaven Ministry’ yishwe n’umugabo we

@Umubavu.com



Tanga igitekerezo kuri iyi nkuru



Igitekerezo
Diven Kuya 28-03-2018

Birababaje rwose nonese niba murugo rwabo harahoragamo amakimbirane kuki batatandukanye cg ng’ubuyobozi bukumire icyaha kitaraba