Mu mvugo  yeruye, Perezida Kagame yikomye HRW n’abasebya u Rwanda bose

Perezida Kagame yavuze ko abantu bavuga nabi u Rwanda yaba mu nyandiko no mu bundi buryo, n’abagaragaza ko ari umunyagitugu cyangwa se ko atihanganira abamunenga, bose bibeshya kuko uko bafata u Rwanda nawe ubwe ntaho bihuriye n’ukuri.

Umukuru w’Igihugu yabitangaje mu ijoro ryo kuri uyu wa Gatanu ubwo yari yitabiriye umugoroba w’umusangiro usoza ihuriro ry’abagize Unity Club Intwararumuri ryabaga ku nshuro ya 10.

Umuryango Unity Club Intwararumuri, uhuriza hamwe abagize Guverinoma, abigeze kuyibamo ndetse n’abo bashakanye. Abinjiye muri Guverinoma bwa mbere kuwa 31 Kanama uyu mwaka n’abo bashakanye bagera kuri 18 bahawe ikaze muri uyu muryango umaze imyaka 21 ushinzwe.

Perezida Kagame witabiriye uyu musangiro wabereye muri Kigali Convention Center, yashimye umusanzu wa Unity Club mu guhuriza hamwe abahoze ari abayobozi n’abari muri Guverinoma muri iki gihe ku buryo bahora ari umuryango umwe.

Umukuru w’Igihugu mu ijambo rye yavuze ko amateka y’u Rwanda yerekanye ibintu bibiri by’ingenzi. Ibyo birimo ibibi umuntu ashobora gukora aribyo byabaye mu gihe cya Jenoside yakorewe Abatutsi, ndetse n’ibyiza yifitemo aribyo biboneka mu banyarwanda ba none.

Yakomeje avuga ko abantu bamwe bavuga u Rwanda mu buryo butandukanye ariko icy’ingenzi ari uko rwagirira abanyarwanda bose akamaro.

Perezida Kagame yabwiye aba bayobozi ko mu 2009 ubwo yatangiraga gukoresha Twitter, hari umunyaburayi wanditse avuga k’u Rwanda no kuri we ubwite [Kagame], kuko yari asigaye akoresha uru rubuga nkoranyambaga, aramusubiza amubwira ko ibyo yavuze ataribyo.

Ati “Naramusubije, ndamubwira nti oya, wibeshye. Uwo ntabwo ari njye, urwo ntabwo ari u Rwanda,iyo ntabwo ari Politiki yacu. Twarakomeje, ku musozo, umwanzuro we hamwe n’abandi bagenzi be wari ukuvuga ngo Kagame ntiyihanganira abamunenga.”

“N’igihe babyanditse narabasubije ndababwira nti ahubwo ni mwe mutihanganira ababanenga kuko njye ntemeranya namwe nkabaha ibimenyetso. Mwanengaga, si ukunenga gusa ahubwo muri no kunsebya, hanyuma mugihe mbabwiye ibyo ntekereza, ibimenyetso byanjye, ubu byahindutse mwese mwahuriye ku kuvuga ngo ntabwo nihanganira abanenga ariko mwe ntimwihanganira ababanenga na busa kuko ntimuri kumva ibitekerezo byanjye.

Asubiza HRW,Perezida Kagame yavuze ko yamaze imyaka itanu muri Uganda arwanira uburenganzira bwe buri munsi atazi ko ari buramuke, yongeraho indi ine ‘mu Rwanda ntazi ko nzabaho undi munsi’.

Ibi Umukuru w’Igihugu yabigarutseho mu gihe hashize iminsi mike mu Rwanda hamaganywe Raporo y’amapaji 60 yiswe “ All Thieves must Be Killed” bishatse kuvuga ngo ‘Abajura bose bagomba kwicwa’ yasohowe n’Umuryango Human Rights Watch, ku wa 5 Nyakanga 2017.

Avuga kuri Kenneth Roth uyobora HRW, yagize ati “ Ndashaka kubwira uyu mugabo wa Human Right Watch uhora ansebya, asebya u Rwanda, ndi mu mwanya mwiza wo guharanira uburenganzira bwa muntu kurusha uko ubikora, […] kuri njye nemeye guhara ubuzima bwanjye, nashyize ubuzima bwanjye mu kaga kubera ubwisanzure bwanjye nagombaga guharanira, twese hamwe nk’abanyarwanda kubera ubwisanzure bwacu n’ubw’abaturage bacu.”

Perezida Kagame yakomeje avuga ko abavuga nabi u Rwanda uyu munsi ari nabo barutereranye mu 1994. Ati “Mwacyuye ingabo zanyu mu gihe abantu bicwaga. Twe twarimo turwana. Ese uburenganzira bwa muntu muba muvuga ni ubuhe ?”

Yavuze kandi ko iki gihugu cyigeze kujya kigaburirwa imfashanyo z’ibiribwa ndetse ko mu 2007 aribwo ubuhinzi bwatangiye gutera imbere mu Rwanda.

JPEG - 153.9 ko
Perezida Kagame yavuze ku matora

Perezida Kagame yavuze ko mu gihe cy’amatora aherutse ubwo abanyarwanda bari mu bikorwa byo guhitamo Umukuru w’Igihugu, bari bahugiye mu kiganiro kimwe, no hanze y’u Rwanda naho hari abanyamahanga nabo bafite ikindi bahugiyeho.

Yakomeje avuga ko abo banyamahanga bibazaga bati ‘ni guhe abanyarwanda bongeye gutekereza ko Kagame ababera Perezida’.

Yongeyeho ko yabonye ubutumwa ahantu hose abantu bajya impaka, kugera ubwo bamwe mu nshuti ze baje kumureba cyangwa bakamutumaho inshuti zabo bagamije ko adakomeza kuyobora u Rwanda. Umukuru w’Igihugu yavuze ko Minisitiri w’Ububanyi n’Amahanga, Louise Mushikiwabo, yamubera umutangabuhamya kuri ibyo.

Ati “Inama bampaga zari ukuvuga ngo ariko se ni gute wenda utakora nk’ibyo Putin umwe wo mu Burusiya yakoze. Ni ukuvuga ngo ushobora kugenda ukareba undi akayobora, hanyuma ukaba ukora ariko utagaragara, ugakora icyo ushaka hanyuma mu gihe runaka ukongera ukagaruka.”

Indi nama bamuhaye ngo ni ukureba umwe mu bayobozi mu gihugu akamugira umukuru w’igihugu wo kumusimbura hanyuma we akazajya amugenzura akanamuha amabwiriza. Icya gatatu ngo barakibuze kugeza ubwo ababajije uburyo aribo bari ku isonga mu kwigisha demokarasi barangiza bakananirwa kuyishyira mu bikorwa ubwabo.

Yavuze ko aba banyamahanga batatekerezaga ku mahitamo y’abanyarwanda ahubwo icyo bari bagambiriye ni ugushaka uko bahanganisha abayobozi igihugu gifite.

Ati “Ntabwo abanyaburayi baba batekereza inyungu z’abaturage, baba bishakira uko bakungukira mu gukoresha abayobozi ba Afurika.”

Umuryango Unity Club uharanira gushyira mu bikorwa intego wiyemeje mu rugamba rwo kubera Abanyarwanda urumuri ‘Intwararumuri’, aho hamaze kubakwa inzu eshanu mu turere dutanu aritwo ; Huye, Rulindo, Kamonyi na Kayonza, agenewe Ababyeyi b’Intwaza bagizwe incike na Jenoside yakorewe abatutsi muri Mata 1994.



Tanga igitekerezo kuri iyi nkuru



Igitekerezo
Fitina Fideli Kuya 28-10-2017

Muzehe wacu turamwememera aragahoraho ubunuguhindura itegekonshinga akayobo ntayandimatora yongeyekuba nibereye UG murakoze