Mu Burundi  abantu 6  barishwe  naho  abandi 15 batabwa muri yombi

Umuryango uharanira uburenganzira bwa muntu mu Burundi ,SOS-Torture washyize ahagaragara Raporo ivuga ko muri iki gihugu abantu 6 bishwe naho abandi 15 bagatabwa muri yombi mu buryo bunyuranyije n’amategeko mu gihe cy’iminsi 7 gusa.

Iyi raporo yo kuva kuri Taiki ya 18 kugeza ku ya 25 Ugushyingo 2017, ivuga ko abo bishwe bamwe imirambo yabo yasanzwe mu ruzi rwa Rusizi muri komini Buganda, intara ya Cibitoke , batatu muri bo bakaba batashoboye kumenyekana.

Iyi raporo kandi ya SOS-Torture igaruka kandi ku bana babiri umwe w’imyaka itanu, n’undi w’imyaka 9 baciwe ibiganza muri komine Itaba , intara ya Gitega, bashinjwa kwiba ibigori mu murima.

SOS -Torture inagaruka kandi ku itabwa muri yombi ry’abayoboke batandatu b’Ishyaka FNL riyobowe na Agathon RWASA mu ntara ya Karusi, inyuma yo guhangana n’urubyiruko rwa CNDD-FDD.

Muri iyi Raporo kandi SOS-Torture ivuga ku itabwa muri yombi rya Nestor NIBITANGA wari umuyobozi w’Ishyirahamwe APRODH mu ntara ya Gitega, aho yafashwe n’abashinzwe umutekano bamushinja guhungabanya umutekano w’u Burundi.

Uyu muryango buri minsi 7 ukaba ukora raporo igaragaza uko ibintu byifashe mu Brundi.

Umubavu.com



Tanga igitekerezo kuri iyi nkuru



Igitekerezo