Libya : Abimukira bagurishwa ku isoko nk’amatungo

Ishyirahamwe ry’Ubumwe bwa Afrika (AU) ryatangaje ko rifite ishavu n’agahinda nyuma y’aho habonekeye amafoto yerekana abimukira bo munsi y’ubutayu bwa Sahara barimo bagurishwa ku isoko nk’amatungo mu gihugu cya Libya. Iri soko ngo risanzwe rigurishirizwamo rikanagurirwamo abaja/ababoyi.

Muri video kandi yashyizwe ahagaragara na CNN mu cyumweru gishize, abasore bagaragaye barimo batezwa cyamunara nk’abakozi bo mu mirima.

Umukuru w’Ishirahamwe ry’Ubumwe bwa Afrika, Perezida Alpha Conde wa Guinee, yasabye ko hatangwa ibihano bikarishye ku bihugu bigaragaramo ubwo bucuruzi bw’agahomamunwa.

Abimukira bagerageza kujya i Burayi bavuga ko bafatwa n’abantu rimwe na rimwe bababeshye ko bagiye kubaha akazi bagerayo bakabategeka gukora akazi kavunanye babahemba intica ntikize ndetse rimwe na rimwe nayo batayibonye.

Amavidewo yashyizwe ahabona na CNN yerekana ko bamwe muri aba bantu bagurishwaga muri Libya bakomoka mu gihugu cya Niger no mu bindi bihugu byo munsi y’ubutayu bwa Sahara. Aba bantu bagaragaye bagurishwa ku madolari 400 umwe umwe, ibi bikaba byarabereye mu gace kataramenyekana kugeza ubu.

Ibi bikorwa byo kugira abaja bamwe mu bimukira muri iki gihe byitezwwe ko bigomba kuranduranwa n’imizi yabyo hakoreshejwe uburyo bwose Ishyirahamwe ry’Ubumwe bwa Afrika rifite nkuko Alpha Conde uhagarariye iri shyirahamwe yabivuze.

Igihugu cya Libya cyatangiye iperereza kuri ubu bucuruzi buteye agahinda nkuko CNN yabitangaje ku wa gatanu w’icyumweru gishize.

PNG - 641.5 ko
Buri mwaka abimukira ibihumbi n’ibihumbi bagerageza kwimukira I Burayi baciye muri Mediterane


Mu kwezi kwa kane, Ishirahamwe mpuzamahanga rishinzwe abimukira (OIM) ryavuze ko ryegeranyije ibimenyetso by’abagirwa abaja mu gihugu cya Libya.

Uyoboye iryo shyirahamwe muri Libya, Othman Belbeisi, yabwiye itangazamakuru ko abimikira bagenda bagurishwa hagendewe ku bushobozi bafite.

Yagize ati "Bigaragara ko aba bimukira nta mafaranga baba bafite kandi n’imiryango yabo ntishobora kubabonera amafarang yo kubagombora, ibi nibyo bituma bagurishwa kugira ngo babungukeho na make".

Yakomeje agira ati "Igiciro kiba gitandukanye bitewe n’ibyo ugurishwa ashobora gukora. Nk’urugero mu gihe uzi gusiga inzu, gusasa amakaro mu nzu, cyangwa ukaba uzi gukora ikindi gikorwa neza, ibi bituma igiciro kigenda kizamuka”.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo