Leta ya Tchad irashinjwa gutoteza abayinenga

Umuryango mpuzamahanga uharanira uburenganzira bw’ikiremwa muntu ku isi, Amnesty International, urashinja Leta ya Tchad gutoteza abatavuga rumwe nayo.

Uyu muryango uvuga ko mu myaka ibiri ishize imiryango itegamiye kuri leta mirongo itandatu n’itanu yangiwe gukoresha imyigaragambyo mu mahoro. Amnesty International ivuga kandi ko mu mwaka ushize imbuga za interineti zirenga icumi z’abatavuga rumwe na leta zafunzwe.
Amnesty International ivuga ko Leta ya Tchad ikoresha amategeko akaze agamije kwikiza abatavuga rumwe nayo. Ngo ikoresha kandi inzego zayo zishinzwe iperereza mu gucecekesha impirimbanyi z’uburenganzira bw’ikiremwamuntu, abari mu mashyirahamwe y’abakozi n’abanyamakuru.
Gusa kugeza ubu ntacyo Leta ya Tchad yari yavuga kuri ibyo bivugwa na Amnesty International.
Umunyamakuru wa BBC uri muri ako karere, aravuga ko ibihugu byo mu Burayi na Amerika akenshi bitita cyane ku bishinjwa Leta ya Tchad kubera uruhare rw’ayo mu kurwanya imitwe y’intagondwa zigendera ku matwara akaze y’idini ya Isilamu mu karere irimo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo