Leta y’u Rwanda ntizahwema kugaragaza uruhare rw’u Bufaransa muri Jenoside yo muri Mata 1994

Nyuma yuko Leta y’u Rwanda ishyiriye hanze raporo yakozwe n’itsinda ry’impuguke z’abanyamategeko bo muri Leta zunze ubumwe za Amerika, yanashyikirijwe u Bufaransa, Minisitiri w’Ububanyi n’amahanga w’u Rwanda Louise Mushikiwabo aratangaza ko Leta y’u Rwanda itazahwema kugaragaza ibimenyetso byerekana uruhare rw’igihugu cy’u Bufaransa muri Jenoside yakorewe Abatutsi mu Rwanda muri Mata 1994.

Minisitiri Louise Mushikiwabo yagize ati “Nibyo Leta y’u Rwanda yasabye impuguke mu by’amategeko ndetse no mu iperereza na Cabinet y’abavocat y’abanyamerika bakomoka mu mujyi wa Washington D.C yagiye ikora akazi gakomeye cyane mu iperereza mu bibabzo byagiye biba muri Leta zunze ubumwe Amerika ifite ubushobozi buhambaye.Tuyisaba y’uko yadufasha mu iperereza mu nyandiko zitihishe ziri hirya no hino mu kujya kuganiriza abantu mu gushakisha ibimenyetso byo bishoboka ikatugaragariza vuba uruhare rw’igihugu cy’u Bufaransa ariko cyane cyane bamwe mu bayobozi b’u Bufaransa tuzi neza ko bagize uruhare rugaragara muri Jenoside yakorewe abatutsi muri iki gihugu.”

Umunyamakuru wa RBA abajije Min. Mushikiwabo agaciro baha iyi raporo mu kwerekana uruhare rw’Abafaransa bagize muri Jenoside yakorewe Abatutsi mu 1994, yamushubije agira ati “Iyi raporo rero mu by’ukuri nk’uko nabivuze, bitugaragariza ko ari ibimenyetso bifatika. Ikaba mu myanzuro yayo isaba Leta y’u Rwanda y’uko akazi kakomeza. Turakareba neza mu buryo burambuye kandi mu buryo bufite imyanzuro kuri muntu wese ndetse no mu nyandiko za giye ziba hagati y’abakozi ba Leta y’u Bufaransa.”

Mushikiwabo yabajijwe kandi niba Leta y’u Rwanda izakomeza gukora izo raporo kuburyo n’abandi bazavuka bazajya bareba ibyakozwe n’u Bufaransa mu Rwanda, asubiza muri aya magambo ati “Ntabwo ari ikintu u Rwanda tuzageraho tukarambirwa kubera amanyanga tukabihagarika ntibishoboka. U Rwanda ruzakomeza gukurikirana raporo zizagenda ziyongera ziba nyinshi inyandiko turushaho kuzikwiza kuko iyo umuntu avuze inkuru cyangwa se igitabo cyikandikwa haza n’amafilimi. Uko twebwe twagiye tubibona twari tuziko Leta y’u Bufaransa izageraho igasanga bamwe muri abo benegihugu babo bakoze amahano ndetse nayo izageraho ikusibiraho ikabasaba kwemera uko amateka yagenze ahubwo tubona ko uko iminsi igenda ishira abakoze ibyo byaha bikomeye bihisha muri iki gihugu ndetse na Leta yabo ntisibe guhakana bityo rero twasanze ari ngombwa noneho ko ibyo dufite byose tubishyira ahagaragara.”

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo