Kigali:Pasiteri yatamajwe n’Umukristo wemeje  ko yakoze Jenoside

Pasiteri Nsanzintwari Evariste uri mu kigero cy’imyaka 45, yatawe muri yombi ubwo umwe mu bo yabwirizaga mu rusengero yahishuraga ko akekwaho ibyaha bya Jenoside yakorewe abatutsi mu 1994, aho akomoka.

Nsanzintwari umaze imyaka irenga 10 muri Kigali, akomoka mu yahoze ari Kibuye ari naho bikekwa ko yakoreye ibyaha bya Jenoside. Yari umupasiteri mu idini rito ritarabona ibyangombwa byo gukorera mu Rwanda ryitwa Goshen Universal Church, rikorera mu murenge wa Nyamirambo, akagari ka Kivugiza, mu mudugudu w’Imanzi.

Ejo ku Cyumweru ubwo barimo gusenga, umugabo yabonye uyu mupasiteri amutangaho ubuhamya ko yasize akoze jenoside aho akomoka ndetse n’inkiko Gacaca zamukatiye adahari kuko bari bazi ko yapfuye cyangwa yagumye muri Congo aho yari yarahungiye.

Uyu mugabo yahamirije Radio Flash ko azi neza Nsanzintwari kuko uretse kuba baturanye biganye ndetse bakaragirana bamwitaga ‘Mafiyeri’. Yavuze ko mu gihe cya jenoside yajyaga mu bitero mu duce dutandukanye.

Yagize ati “Gacaca zaramukeneye ziramubura kuko twari tuzi ko yanapfuye, yabaga muri Congo. Yahunze agiye muri Congo nyuma ya jenoside ntiyongera kugaruka...ni umujenosideri warimbuye abantu.”

Yakomeje avuga ko yari umuyobozi mu bitero byibasiraga akarere k’aho bitaga Nyamabumba muri Kibingo no mu bice bya Rutsiro.

Nsanzintwari yari amaranye n’umugore we usanzwe unayobora iri dini imyaka 11 bafitanye abana batatu, yemeza ko nta kibazo bari bafitanye.

Sayinzoga Emmanuel umuvugizi w’itorero Goshen Universal Church, avuga ko bitoroshye kuba bari kumenya niba Nsanzintwari yarakoze ibyo byaha, gusa avuga ko hari imiterere yagaragazaga ko hari amabanga afite ku mutima we.

Yagize ati “Hari nk’amagambo yamucikaga ukumva ko afitemo akantu...yasaga nk’ushobora kuba afite ikintu yabuze uko abohoka n’uwo yabigezaho.”

Nsanzintwari wafashwe na Dasso n’inkeragutabara ku bufatanye n’abaturage nyuma yo kugerageza gutoroka. Yajyanywe kuri sitasiyo ya polisi ya Nyamirambo ari na ho afungiye.



Tanga igitekerezo kuri iyi nkuru



Igitekerezo