Kigali : Mu minsi mike haraboneka igisubizo kirambye cy’imyanda

Mu nama izabera muri Kigali Convention Center kuva tariki ya 25 kugera 29 Nzeli 2017 yateguwe na Minisiteri y’ibikorwa Remezo ifatanyije n’Urugaga rwa ba Enjeniyeri mu Rwanda (Institute of Engineers Rwanda-IER) ndetse n’Impuzamashyirahamwe y’aba Enjeniyeri muri Afurika (Federation of Africa Engineering Organisations-FAEO) hitezwemo igisubizo kirambye cy’imyanda hagendewe ku nsanganyamatsiko yayo igira iti “Turusheho gucunga neza imyanda muri Afurika”.

iyi nama izitabirwa n’abantu batandukanye barimo Impuguke n’Abashakashatsi bo muri Afurika ndetse no hanze yayo bakora mu bijyanye n’imicungire y’ imyanda kugira ngo bazasangize abandi ingamba n’ubunararibonye mu guhangana n’ikibazo cy’imicungire y’imyanda ndetse n’ingaruka zayo.
Si aba gusa bayitumiwemo kuko hatumiwemo na ba Enjeniyeri, Abikorera, Abarimu ba za Kaminuza, Abashakashatsi, Impuguke mu bukungu, Abashinzwe igenamigambi, izindi nzego za Leta n’izigenga n’abandi bafatanyabikorwa bazaturuka mu Rwanda, mu Karere ruherereyemo no ku rwego mpuzamahanga.
Mu kiganiro n’abanyamakuru kuri uyu wa kane muri Grand Legacy Hotel, Minisiteri y’Ibikorwa Remezo, Urugaga rwa ba Enjeniyeri mu Rwanda ndetse n’ubuyobozi bw’Umugi wa Kigali basobanuye ko muri iyi nama byanze bikunze hitezwemo igisubizo kirambye cy’imyanda usanga yateje ikibazo mu mugi.
Uwari uhagarariye urugaga rwa ba Enjeniyeri yavuze ko hari gukorwa inyigo y’ukuntu imyanda yajya ibyazwa umusaruro aho guteza ibibazo, anasobanyura ko hari abafatanyabikorwa bafite muri iyi gahunda nubwo bikiri mu nyigo.
Yongeyeho ko iyi myanda izajya itandukanywa mbere yuko itwarwa ibora ikajyanwa ukwayo ndetse n’itabora ikajyanwa ukwayo kugira ngo izabone uko ibyazwa umusaruro.
Ubuyobozi bw’Umugi wa Kigali nabwo bwavuze ko bufite gahunda nyinshi zirimo gushaka uburyo amazi yose ava mu ngo no ku mazu yafatwa agahurizwa hamwe nayo akajya abyazwa umusaruro aho kwangiriza abaturage.
Iyi nama yitwezwemo inyungu nyinshi zirimo gukorera hamwe mu rugaga kuri aba ba Enjeniyeri, kunguka ubumenyi bwisumbuye ku bwo bari bafite mu gucunga, gutunganya ndetse no kubyaza umusaruro imyanda.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo