Kigali:Abakanishi bakorera   muri ’Tarinyota’  baratabaza

Abakora akazi ko gukanika ibinyabiziga bitandukanye mu gace ka Tarinyota ahazwi nko mu Biryogo mu Murenge wa Nyarugenge ho mu Karare ka Nyarugenge bavuga ko ibyo bakorerwa ari uguhohoterwa kuko bafatwa n’imodoka y’Umurenge bakajyanwa gufungwa utanze amande y’ibihumbi 10 by’amafaranga y’u Rwanda akabona kugaruka mu kazi naho utayatanze bikamuviramo kujyanwa i Gikondo.

Aba bakanishi bashimangira ko bafatwa bagafungwa ndetse ko abantu bagenda muri iyi modoka y’u Murenge wa Nyarugenge bababangamira cyane mu kazi kabo ka buri musi.

Bakomeza bavuga ko ababafata nta kintu bagenderaho kuko ngo waba uhagaze cyangwa urimo gukanika baza bakagufata ukajya kwishyura ibyo bihumbi 10 ngo utayatanze ajyanywa i Gikondo aho afite gufungwa ibyumweru bibiri cyangwa bitatu.

Umunyamabanga Nshingwabikorwa w’Umurenge wa Nyarugenge,Havuguziga Charles yabwiye City Radio dukesha iyi nkuru ko batazihanganira abakora bene ubu bukanishi.

Ati’’Turafata abantu batangiye gufungura amapine, tugafata abantu bogereza imodoka mu muhanda , ntabwo turi gufata umuntu wigendera kuko mu Rwanda ntawe ufata umuntu wigendera ’’

Uyu muyobozi avuga ko aba bakanishi bemerewe kuba bajya gukanikira imodoka ahandi hatari mu Biryogo ariko hemewe aho kubikorera mu muhanda kuko bitemewe.

Havuguziga ashimangira ko Umurenge watangiye ibikorwa bihoraho byo gufata abakora ibinyuranyije n’amabwiriza bagakanikira ibinyabiziga mu muhanda.

Ku bijyanye no kuba aba bakanishi bacibwa amafaranga bagahabwa inyemezabwishyu iriho amazina ariko ntisobanure impamvu y’aya mafaranga, Havuguziga abitera utwatsi ati’’Nta mande duca’’.

Gusa ngo niba hari abafite inyemezabwishyu ziriho amazina n’umubare w’amafaranga ngo ni ikibazo ubuyobozi bugiye kugenzura no gusuzumwa.

Aba ngo bakomeje gutabwa muri yombi mu gihe hari harakozwe inama hagati y’ubuyobozi ndetse n’abakora akazi ko gukanirakira ibinyabiziga muri aka gace ndetse hagashyirwaho komite igamije gukangurira abantu gukora aka kazi neza mu rwego rwo kwirinda ubujura bwa hato na hato ariko ngo aba bakanishi ntibahabwa umwanya ngo babashe kuvuga ibibazo byabo.

Gabriel Habineza/Umubavu.com



Tanga igitekerezo kuri iyi nkuru



Igitekerezo