Kenya : Umutekano wakajijwe ku buryo dudasanzwe kubera imyigaragambyo ikaze

Abashinzwe umutekano mu gihugu cya Kenya ubu baragenzura umunota ku wundi uduce tumwe na tumwe tubarizwa mu mugi wa Nairobi dukunze kuberamo imyigaragambyo yo kwamagana bamwe mu bagize akanana gashinzwe gutegura amatora IEBC yatangijwe n’imiryango ndetse n’amashyaka atavuga rumwe n’ubutegetsi bwa Kenya nka NASA.

Iyi myigaragambyo ngo biteganyijwe ko izaba kabiri muri iki cyumweru ikaba yarateguwe na Raila Odinga umuyobozi w’ishyaka rya NASA risanzwe ridacana uwaka n’ubutegetsi bwa Kenya. Raila Odinga yateguye iyi myigaragambyo avuga ko adashaka bamwe mu bagize aka kanama gashinzwe gutegura amatora nyuma yuko urukiko rukuru rutesheje agaciro ibyari byavuye mu matora ruvuga ko aya matora yabayemo uburiganya kandi bigizwemo uruhari na bamwe mu bagize aka kanama.

Abayoboke b’ishyaka rya Odinga (NASA) bitezwe kujya ku biro by’akanama gashinzwe gutegura amatora (IEBC) mu gihe abashinzwe umutekano nabo bazindutse bahakikije. Gusa nubwo bimeze bitya umukuru w’ishyaka rya NASA, Raila Odinga yabujije abashinzwe umutekano kugira uwo bahutaza mu myigaragambyo iteganyijwe kuri uyu wa mbere.
Abapolisi ndetse n’abakozi ba leta muri Kenya nibo bakwiye gukingira abanyakenya bose babafasha gukomeza umutekano no kwubahiriza amategeko cyane ko imyanya barimo babukesha imisoro iva mu baturage bayoboye nkuko Raila Odinga yabivuze.

Bwana Raila Odinga avuga ko abaturage ba Kenya bemererwa imyigaragambyo n’Itegeko Nshinga rya Kenya ko bityo ntawugomba kubibuzwa cyangwa ngo ahutazwe mu buryo ubwo ari bwo bwose.
Yavuze kandi ko imyigaragambyo yateguye ifite intego yo kwamagananira kure umugambi w’abo mu ishyaka rya Jubilee rirongowe na Perezida Uhuru Kenyatta wo guhindura amwe mu mategeko agenga amatora avuga ko atandukanye n’Itegeko Nshinga.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo