Kenya : Inzoka idasanzwe yari yivuganye abigaragambyaga ku rukiko rukuru

Kuri uyu wa gatatu mu mugi wa Meru ubarizwa mu gihugu cya Kenya, buri wese byari ugukizwa n’amaguru nyuma yo kubona iyi nzoka nini cyane muri uyu mugi cyane ko yateye aho abigaragambirizaga hanze y’urukiko rukuru rwa Kenya ibyabaye nk’amayobera kuri aba bantu bibaza aho iturutse.

Abanyakenya bari muri uyu mugi bavuze ko ibyo barimo byose byahise bihagarara nyuma yuko iyi nzoka ibateye cyane ko batamenye aho iturutse. Iyi nzoka bivugwa ko irengeje mu biro 20 byose ndetse ikanagira uburebure bwa metero zirenga 16 yateye muri uyu mugi nta n’umwe uzi aho iturutse niko guhangayikisha abari aho bose by’umwihariko kuko yateye mu gace abigaragambirizaga imbere y’urukiko rukuru rwa Kenya bari bakambitse ngo banenga icyemezo uru rukiko ruheruka gufata cyo gutesha agaciro ibyari byavuye mu matora.
Nyuma y’ubugenzuzi bwakozwe ngo haketswe ko iyi nzoka yateye muri uyu mugi iturutse muri pariki y’inyamaswa. Kubw’amahirwe iyi nzoka yahise ifatwa itaragira umuntu iruma isubizwa muri pariki aho yari yaturutse.
Iyi nzoka yaje muri uyu jugi nyuma gake y’aho n’ubundi inzuki zitatanyije abigaragambirizaga ku rukiko rukuru rwa Kenya bo mu ishyaka rya Jubilee riri ku butegetsi bavuga ko uru rukiko rutagombaga gutesha agaciro intsinzi y’umukandida wabo Uhuru Kenyatta.
Ku itariki ya mbere y’uku kwezi kwa 9 nibwo urukiko rukuru rwa Kenya rwatesheje agaciro ibyari byavuye mu matora yabaye tariki ya 8 z’ukwezi gushize ruvuga ko yabayemo uburiganya bityo rwanzura ko aya matora agomba gusubirwamo. Biteganyijwe ko aya matora azasubirwamo tariki ya 17 z’ukwezi gutaha kwa cumi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo