Kenya : Ifoto ya Uhuru Kenyata afite imbunda yavugishije abanyakenya amangambure

Perezida Uhuru Kenyatta yagaragaye mu ifoto afite imbunda mu ntoki, ibi bikaba byatumye abaturage b’igihugu cya Kenya bibaza byinshi kuri iyi foto mu gihe iki gihugu kiri mu nkubiri y’amatora ateganyijwe gusubirwamo muri uku kwezi k’Ukwakira .

Nkuko ibitangazamakuru bimwe na bimwe byo mu gihugu cya Kenya nka Tuko.co.ke bibivuga, ngo bigaragara ko Kenyatta yari afite gahunda yo kurasa ngo gusa ahantu yashakaga kurasa kugeza ubu niho hataramenyekana. Ku ifoto Uhuru Kenyatta yari afite imbunda, yari yiyambariye imyenda isanzwe itari iya gisirikari ari kumwe n’umugore nawe hatatangajwe amazina ye.
Gusa nubwo aya mafoto hari abanyakenya bamwe na bamwe yatangaje ndetse bakanayishimira, hari n’abatabyishimiye bagendeye ko iki gihugu kuri ubu kiri mu bibazo bikomeye nyuma yuko urukiko rukuru rutesheje agaciro ibyari byavuye mu matora yabaye mu kwezi kwa 8 aho Uhuru Kenyatta ari we wari wegukanye ntsinzi gusa bikavugwa ko aya matora yari yabayemo uburiganya ari nabyo byatumye uru rukiko rutesha agaciro ibyari byayavuyemo.
Iyi foto yafashwe byavuzwe ko Uhuru Kenyatta yari yibereye mu kiruhuko yirira ubuzima nubwo hari abatabona ko ari ukwirira ubuzima ahubwo bakabibonamo ikindi kintu.
Kuri iyi foto kandi yatumye abanyakenya bamwe na bamwe bacika ururondogoro, bigaragara ko Uhuru Kenyatta yari arimo gufata ibyo kurya bya saa sita ari kumwe n’uyu mugore nawe utavuzwe amazina ubwo barasaga ahantu hataramenyekana.

Tubibutse ko amatora y’umukuru w’igihugu mu gihugu cya Kenya ateganyijwe gusubirwamo muri uku kwezi k’Ukwakira 26/2017. Ibi byemejwe nyuma yaho urukiko rukuru rutesheje agaciro ibyari byavuye mu matora yabaye mbere ruvuga ko habayemo uburiganya. Muri aya matora hazaba hahanganye abakandida 2 gusa ari bo Uhuru Kenyatta na Raila Odinga nkuko byemejwe n’akanama gashinzwe gutegura amatora muri iki gihugu.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo