Kenya : Ifoto ya Jomo Kenyatta igiye gukurwa ku mafaranga

Guverineri wa Banki Nkuru y’igihugu cya Kenya, Patrick Njoroge yemeye ko agiye gukura ifoto ya Perezida wa mbere w’igihugu cya Kenya Jomo Kenyatta ku mafaranga akoreshwa muri iki gihugu.

Patrick Njoroge yemeye ibi nyuma yuko abanyakenya bamwe na bamwe bamwandikiye ibaruwa bamusaba ko ifoto ya Jomo Kenyatta yakurwa ku mafaranga bakoresha bitewe nuko babona itagikenewe. Uyu mugabo akaba yarahawe iminsi igera kuri irindwi yo kuba yamaze gusiba iyi foto ku mafaranga akoreshwa mu gihugu cya Kenya.
Abanyakenya bakoze ibi nyuma yuko bumva bakeneye impinduka ku mafaranga bakoresha mu buzima bwabo bwa buri munsi mu gihugu cyabo nkuko babyemerewe na Banki Nkuru y’iki gihugu ko igiye gukura iyi foto ku mafaranga akoreshwa.
Ibi byabaye kandi nyuma yuko umugabo witwa Okiya Omtata usanzwe ari impirimbanyi y’impinduramatwara mu gihugu cya Kenya nawe yandikiye Banki Nkuru ya Kenya yifuza ko amafaranga y’iki gihugu yakurwaho ifoto ya Jomo Kenyatta ariko bigakorwa hubahirijwe amategeko ndetse hitawe ku cyo ateganya kuri iyi ngingo.

Patrick Njoroge yemeye ko iyi foto izakurwa ku mafaranga ya Kenya ngo gusa ntiyatangaje itariki nyirizina iki gikorwa kizatangiriraho.
Kuri Okiya Omtatah nawe wandikiye Banki Nkuru ya Kenya asaba ko ifoto ya Jomo Kenyatta yakurwa ku mafaranga yose ya Kenya, avuga ko amategeko ateganya ko ifoto runaka ifite aho ihuriye n’igihugu ishobora gukoreshwa ku mafaranga. Okiya Omtata yagize ati “ amafaranga yose yakozwe na Banki Nkuru y’igihugu ashobora kuba ariho ifoto ihagarariye igihugu cyangwa cyangwa zifite aho zihuriye n’igihugu ariko ntibivuze ifoto y’umuntu ku giti cye, Ingingo ya 231 mu Itegeko Nshinga rya Repubulika ya Kenya”.

Iyi ni inoti y’amashilingi 100 ya Kenya igaragaraho ifoto ya Jomo Kenyatta
Okiya Omtata yari yahaye Patrick Njoroge iminsi igera kuri irindwi ngo abe yakuye ifoto ya Jomo Kenyatta ku mafaranga ya Kenya ngo bitaba ibyo akamujyana mu nkiko nkuko amategeko abiteganya.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo