Karongi: Ibiza byahitanye abantu 10 abandi baburirwa irengero

Mu ijoro ryakeye mu Karere ka Karongi imvura yaguye ari nyinshi iteza ibiza bikomeye byateje inkangu zasenyuye amazu agera kuri 22 ndetse n’abantu bahaburira ubuzima.

Amakuru Umubavu.com dukesha bamwe mu baturage batuye hafi y’aho ibi biza byabereye, aravuga ko umurenge wibasiwe n’ibi biza ari umurenge wa Rwankuba, kugeza ubu abantu bamaze kumenyekana ko bapfuye bakaba ari abantu 10 mu gihe abandi bakomeje kuburirwa irengero.
Aganira na RBA, Umunyamabanga Nshingwabikorwa w’Umurenge wa Rwankuba, Kuzabaganwa Vedaste, yatangaje ko iyi mvura yatangiye kugwa ahagana saa munani z’ijoro igateza inkangu zahitanye ubuzima bw’abantu.
Yagize ati ‘‘Muri rusange ni ahantu hari umusozi wamanutse ukajya umanura ubutaka bukagwira inzu zirimo abantu bagahita bitaba Imana. Byabaye mu tugari dutandukanye ntabwo ari ahantu hamwe.’’
Uretse abantu icumi baguye muri ibi biza, ibarura ryakozwe rimaze kugaragaza ko inzu zigera kuri 22 zasenyutse mu gihe hagikusanywa ibyangiritse byose. Imibare y’abitabye Imana ishobora kwiyongera kuko inzego zitandukanye ziracyashakisha andi makuru.

PNG - 1.1 Mb
Inzu zigera kuri 22 zasenywe n’imvura idasanzwe mu murenge wa Rwankuba mu Karere ka Karongi


Imibare y’abahitanywe n’ibiza ndetse n’ibyangirika yiyongera buri munsi by’umwihariko muri iki gihe cy’imvura idasanzwe ikomeje kwibasira ibice bitandukanye by’igihugu.

Minisiteri Ishinzwe Impunzi n’Imicungire y’Ibiza mu Rwanda (Midimar), iheruka kugaragaza ko kuva muri Mutarama kugeza ku wa 30 Mata 2018, mu gihugu hose abantu 116 bahitanywe n’ibiza, 207 barakomereka. Inzu 4130 zarangiritse, izigera ku 1201 zisenyuka burundu, amatungo 705 arapfa n’ibiraro 33 birasenyuka. Mu bindi bikorwa byangijwe n’ibiza birimo imihanda 12 yangiritse n’insengero zirindwi zasenyutse.

Daniel MUKESHIMANA@Umubavu.com


Travel for Free!


Tanga igitekerezo kuri iyi nkuru



Igitekerezo