Kamonyi :Chorale Maranatha ya ADEPR Rukili yongeye kwigarurira imitima y’abatari bake

Chorale maranatha yo ku mudugudu wa Rukili ya 1,muri ADEPR Paruwase ya Rukili,uretse impano yo kuririmba yagaragaje ko ifite n’umwihariko w’ikirenga mu gufasha, aho batanze amafaranga n’ubundi bufasha mu gikorwa cyo kubaka inzu izafasha abantu gusenga no gukira imvune zo mu mutima,ku Mudugudu wa Gatizo muri Paruwase ya GIHINGA mu karere ka Kamonyi.

Kuri icyi cyumweru tariki ya 20/08/2018,ahagana mu masaha ya saa tatu za mugitondo nibwo Chorale MARANATHA,iherekejwe n’inshuti n’abakunzi bayo yasesekaye mu karere ka Kamonyi muri paruwasi ya GIHINGA/ umudugudu wa GATIZO,aho yakiranwe ubwuzu,urugwiro ndetse n’urukundo rwagaragariraga mu marangamutima y’abana,abakuru ndetse n’abasheshe akanguhe bari babukereye kwihera ijisho iyi Chorale.

Ku ikubitiro abaririmbyi n’ababaherekeje babanje kugaragarizwa ubwuzu n’umushumba wa Paruwase ya Gihinga Jonas,wavuze ko abahaye ikaze muri paruwase ayoboye anabaragiza Imana ndetse anayisaba kubana nabo mu bikorwa byose byagombaga kuhabera.

Icyi giterane cyaranzwe no kwishimira indirimbo zigarurira abatari bake ibyishimo n’umunezero haba izo baririmbiwe na Chorale maranatha,ndetse n’umuhanzi ku giti cye Valens uzwi ku izina rya ZIRAZIRITSE waririmbye indirimbo yitwa :Imana ni serieux ndetse n’akamanyu k’umutsima maze abari aho bose batangira kubona ko ibintu bitangiye kuba ibindi.

Uwateganyaga kurangara ntibyari bigishobotse kuko hakurikiyeho Chorale maranatha noneho ibintu bigahinduka aho ubasha gutaruka yatarutse,ubasha kubyina akabyina mbese buri wese n’ikijyane no kwishima kwe,aho amarangamutima y’ibyishimo byabo yakomeje agaragarira abantu bose ubwo bageraga mu gikorwa cyo kwitnga bamwe bagakuramo amakote bambaye,abandi bagatanga za telephone,abandi amashakoshi n’amaterefone ngo bashyigikire umurimo w’Imana.

Chorale maranatha nayo yagaragaje urugero rwo hejuru muri icyi gikorwa cyo kwitanga nyuma y’aho bitanze haba kuri chorale yatanze ibihumbi ijana ndetse n’bandi buri wese bagiye bitanga kugeza ku mafranga abarirwa mu bihumbi 350 (350.000).

NTEZIRYAYO Simeon umuyobozi wungirije wa Chorale Maranatha,avuga ko bashimishijwe n’uburyo bakiriwe ndetse bagashimira Imana uburyo yabanye nabo,kandi akavuga ko umurimo wo gufasha ari ubuzima bwabo cyane ko nabo ubwabo iyo habayeho ugira ikibazo bamufasha.

Yagize ati :”Dufitanye umubano mwiza n’iyi paruwase kuko muri 2015nabwo twari hano muri iyi paruwase,aba bose n’inshuti zacu,twahujwe n’amaraso ya yesu kandi bidukora ku mutima tukanezerwa,uretse kuba dutanga ubufasha mu bikorwa nk’ibi byose ntitwiyibagirwa natwe ubwacu kuko iyo hari ufite ikibazo muri twe turafashanya kuko gufashanya ni umuco wacu”.

Naho NTIVUNWA J. de Dieu umuyobozi wa Chorale Maranatha we avuga ko bashima Imana ku bw’intambwe nziza batera mu kuvuga ubutumwa no gutera inkunga umurimo w’Imana.

Yagize ati :”twaje tuzi ko hagomba kubaho igikorwa cy’ubufasha kandi duhora twiteguye gutanga inkunga y’ubufasha iyo ariyo yose ipfa kuba ari inkunga yo gukora ibyiza.

Yavuze kandi ko kuba batanze inkunga iri hejuru y’ibihumbi 350,ngo ntibatunguwe kuko umutima wo gufasha uba mu maraso yabo.

Yasoje ashimira Imana yabanye nabo ndetse n’abakiristo ba Gatizo uburyo babagaragarije urukundo,aho yagize ati :”ntitwatunguwe n’abantu b’aha kuko twabonye ari abantu bafite urukundo muri bo”.

Mwarimu HABIMANA Aloys ari nawe waje ayoboye iyi Chorale,yavuze ko banezejwe cyane no kuba bagiriye ibihe byiza muri Gatizo.

Yagize ati :”gukorera Imana nta gihombo,ibyo dukora mu isi n’ibyo tuzasiga ariko ibyo dukorera Imana tuzabisanga,ndifuriza abantu bose kumenya Imana kuko gukorera Imana ni byiza,uba ubika ubutunzi bwawe aho inyenzi n’ingese bitagera,twishimiye uburyo abantu ba hano batwakiriye kandi turashimira n’Imana yadushoboje kuri buri kimwe cyose twakoreye aha hantu”.

Yasoje kandi ahamagarira abantu kugira urukundo,gufashanya kugira ubumwe no gukizwa kugira ngo Imana izabajyane mu ijuru.

Rev. RWINIKIZA Jonas,umushumba wa Paruwase ya Gihinga,yavuze ko impamvu bateguye icyi gikorwa ari ukugira ngo bafatanye na Chorale bakunda kandi babonyemo umumaro n’ubucuti mu buryo bw’amasengesho mu gutangiza igikorwa cyo kubaka inzu yo gukoreramo amasengesho,gusengera abarwayi,ibitaro bizakirirwamo abazaza barushye bifuza gukira mu buryo bw’umwuka hakoreshejwe amasengesho,ikaba igoma kuzuzura itwaye akayabo ka miliyoni 300-500”.

Yagize ati :”abarwayi barwaye indwara zinyuranye bazajya bajyanwa muri iyo nzu maze basengerwe,akaba ari nawo mwihariko wayo.

Yatangaje ko inkunga babonye ifatika(cash) igera ku bihumbi 400,ariko hakaba hari n’abandi bagiye biyemeza kuzatanga inkunga yabo mu gihe kizaza.
Yasoje ashimira iyi chorale yaje kubafasha mu ndirimbo n’ijambo ry’Imana ndetse bakinjirana muri icyo gikorwa cy’ubwitange kandi cyagenze neza.

Iyi chorale yahawe agaseke karimo impamba icyakora ntihagaragajwe icyari kirimo ariko bamwe mu bagize iyi chorale bavuga ko ibi ari ibisubizo byavuye mu masengesho basenze mbere yo kuza muri uru rugendo dore ko bamaze iminsi ibiri ,basenga bahamagara ndetse basaba Imana kuzabana nabo ikabayobora, ikabagenda imbere muri uru rugendo.

Chorale Maranatha imaze gushinga imizi kubera urufatiro,uruhererekane n’urunyurane bigize indirimbo zabo,ibi akaba ari nabyo biyifasha kwigarurira imitima y’abatari bake,abandi kandi ngo bayikundira ko ikora ivugabutumwa ryo gufasha,kuririmba no kubana neza,ni chorale igizwe n’abaririmbyi bagera kuri 90,harimo abagabo,abagore abasore n’abakobwa.

Anaclet NTIRUSHWA//Umubavu.com



Tanga igitekerezo kuri iyi nkuru



Igitekerezo