Izingiro ry’amakimbirane  atutumba hagati ya KNC na Nyagatare bapfa Radio 1

Urubanza rw’Ikigo ya Radio 1 Rwanda Ltd rwari rumaze imyaka itanu hagati y’Umunyamakuru akaba n’Umuyobozi wa Radio 1 na TV1, Kakoze Nkuriza Charles uzwi nka KNC na Nyagatare Jean Luc bapfa imigabane muri iyo sosiyete rwasojwe n’Urukiko rw’Ikirenga.

Aba bombi baziranye cyane ku mushinga wo gutangiza Radio 1, by’umwihariko KNC nk’uwagize igitekerezo akagishyira mu bikorwa yaje gushaka uwo bafatanya kugira ngo imirimo ikomeze neza niko kwegera Nyagatare amugurisha imigabane.

Gusa nyuma yo kugurisha iyi migabane, aba bagabo bombi hari ibyo batumvikanyeho byaje kugeza n’aho bitabaza inkiko. Iby’iyi dosiye byatangiye ku wa 02 Kanama 2012, ubwo KNC yandikiraga Nyagatare Jean Luc amubwira ko atagifite ububasha ku bikorwa bya Radio 1 Rwanda Ltd, ngo kuko atujuje umubare w’amafaranga angana na miliyoni 35 z’amafaranga y’u Rwanda bari barumvikanye amugurisha imigabane ingana na 50%.

Nk’uko bigaragara mu nyandiko zo kwandikisha icyo kigo mu Kigo cy’Igihugu cy’Iterambere,RDB, KNC, niwe watangije Ikigo Radio 1 Rwanda Ltd ku itariki ya 09 Gicurasi 2011 nyuma y’ukwezi kumwe agira Nyagatare umunyamigabane.

Nyuma y’amezi ane Radiyo 1 itangiye kuvuga ; KNC yahagaritse Nyagatare amubuza kugera muri radiyo ngo kuko atigeze yubahiriza amasezerano bagiranye.

Hashize iminsi mike, Nyagatare yarabiregeye mu rukiko rw’ubucuruzi rwa Nyarugenge. Icyo gihe rwemeje ko Nyagatare Jean Luc yirukanywe na KNC mu buryo butubahirije amategeko, rwemeza ko akiri umunyamigabane wa Radio 1 Rwanda Ltd. KNC na we aza kujurira mu Rukiko rw’Ikirenga.

Urukiko rw’Ikirenga rwaciye urwo rubanza maze rwemeza ko KNC ashyira mu bikorwa imyanzuro itanu irimo ko ubujurire bwa Nyagatare Jean Luc bufite ishingiro, kandi ko urubanza rwajuririwe ruhindutse, rwemeje ko icyemezo cyafashwe na Kakoza Nkuriza Charles cyo kwirukana Nyagatare nk’umunyamigabane wa Radio 1 Rwanda Ltd kidakurikije amategeko bityo kikaba gikuweho.

Rwemeje kandi ko Nyagatare akiri umunyamigabane wa Radio 1 Rwanda Ltd, rwategetse KNC guha Nyagatare indishyi zo gukurikirana urubanza no guhemba umwunganizi zingana na 1 500 000 Frw, rwanategetse kandi KNC kwishyura 200 0000 Frw yasigaye ku gihembo cy’umuhanga wakoze igenzuramari rya Radio 1 ari we ABC Cosultants ltd, kandi akazasubiza Nyagatare 100 0000 Frw yatanze nka avansi y’icyo gihembo akishyura n’amagarama y’urubanza angana na 24 600 Frw.

Mu kiganiro yagiranye na IGIHE, KNC yavuze ko yamaze kwishyura amafaranga yose yasabwe mu myanzuro y’Urukiko rw’Ikirenga ndetse ko yemera gusubiza Nyagatare mu banyamigabane ariko akazishyura amafaranga yasigaye angana na miliyoni 26 kugira ngo abe miliyoni 35 nk’uko babyeranyije.

Ibyo avuga ko yanabimwandikiye mu ibaruwa imutumira mu nama n’abanyamigabane.
Nyagatare avuga ko hari ibitaranoga

KNC avuga ko yemeye guha Nyagatare ibyo asabwa n’urukiko byose ndetse anakamugira umunyamigabane nta kabuza, gusa Nyagatare ntiyumva ukuntu azishyura amafaranga miliyoni 26 Frw, KNC ntiyishyure kandi avuga ko bashinganye icyo kigo, buri wese agomba gutangamo umusanzu, ibintu KNC yamagana yifashishije inyandiko z’amasezerano bagiranye amugurisha imigabane n’izo yandikiye RDB.

Nyagatare ati “Ikintangaza ni uko avuga ngo antumiye mu nama yo kwiga ku bijyanye n’imigabane yanjye uko yakwishyurwa, yirengagije ko nawe iye atayishyuye kandi ari nayo myinshi, ikindi yirengagiza ni uko amaze imyaka itanu akora, ntabwo nakwishyura imigabane kuko agomba kubanza kunyereka icyo amaze igihe akora n’uko bihagaze.”

Yongeyeho ati “ Nta bubasha afite bwo kumbwira ngo nishyure imigabane muri sosiyete kuko sosiyete ubwayo niyo ishinzwe kwishyuza, ntabwo ari umuntu ku giti cye atari umunyamigabane mugenzi wundi.”

Ku rundi ruhande, KNC we avuga ko atangazwa no kuba Nyagatare ‘yiyita’ uwatangije radio kandi yaramugurishijeho 50% akamugira umunyamigabane nk’abandi bose bazazamo.

Yagize ati “Ntabwo nigeze nshingana radio na Nyagatare, njyewe nagurishije Nyagatare imigabane […] urubanza uko rwaciwe ndarwemera pe kandi n’imyanzuro narayubahirije [...] Nyagatare nawe kandi aherutse kunyandikira ibaruwa ansaba ko nakoresha inama y’abanyamigabane kuko arabizi ko ari njye muyobozi.”

Yongeyeho ati “Nkuko nabimwandikiye sinanze kumugira umunyamigabane ariko agomba kubanza kubahiriza inshingano ze (kwishyura miliyoni 26 Frw zasigaye) Urukiko rw’Ikirenga rutigeze rukuraho kubirebana no kuzuza inshingano ze zo kugura imibane muri Radio 1 Rwanda Ltd kuko ntabwo rwigize rumusonera ayo amafaranga.”

Nyagatare avuga ko bagomba kubanza bagakorana ubugenzuzi (Audit) kuva igihe yaviriye muri icyo kigo kugeza agarutsemo yanyurwa n’umutungo urimo bagakomeza, atanyurwa nawo agasubira kwiyambaza ubutabera.

Radio 1 ihanganishije aba bagabo ni imwe muri radio zirenga 30 ziri mu Rwanda. By’umwihariko ni imwe mu zigenga imaze gushinga imizi cyane ahanini hashingiwe ku biganiro itanga.

Iyi radio ishamikiye kuri Televiziyo ya TV 1 nayo imaze kwigarurira imitima abantu benshi bitewe n’amakuru y’udushya itangaza umunsi ku wundi.



Tanga igitekerezo kuri iyi nkuru



Igitekerezo