Irahira rya Odinga ryatumye bimwe mu bitangazamakuru bikomeye nka NTV na Citizen bifungwa

Mu gitondo cyo kuri uyu wa Kabiri tariki ya 30 Mutarama 2018, ibitangazamakuru bikomeye byo mu gihugu cya Kenya birimo NTV na Citizen TV & Radio, byafunzwe ku buryo bitari kumvikana cyangwa ngo bigaragare mu gihugu hose, kuri uyu munsi w’irahira rya Odinga nka Perezida w’igihugu.

NTV ni televiziyo ikomeye muri Kenya ifitwe n’ikigo Nation Media Group, mu gihe Citizen ari iya Royal Media Services.

Kuri uyu wa Kabiri, Abarwanashyaka b’Ihuriro ry’Amashyaka atavuga rumwe n’ubutegetsi muri Kenya, NASA, yazindukiye mu muhango w’irahira rya Raila Odinga na Kalonzo Musyoka, igikorwa gishobora guteza imvururu zikomeye muri Kenya.

PNG - 880.4 ko
Abaturage ibihumbi n’ibihumbi bashyigikiye irahira rya Odinga nka Perezida w’igihugu


Daily Nation yatangaje ko imodoka ebyiri zirimo n’iya polisi zazindukiye ahari ikoranabuhanga ry’iminara risakaza amajwi n’amashusho muri Kenya, binjira muri iyo nyubako basaba abakozi gukura ku murongo ibi bitangazamakuru.

Hari amakuru ko kuwa Gatanu w’icyumweru gishize, abayobozi b’ibitangazamakuru bikomeye bahamagajwe mu ngoro y’Umukuru w’Igihugu babwirwa ko ibitangazamakuru byabo “bishobora gufungwa cyangwa bikamburwa uburenganzira bwo gukora, nibiramuka bitambukije imbonankubone irahira rya Odinga” kuri uyu wa Kabiri.

Ni inama yitabiriwe na Perezida Kenyatta, Visi Perezida William Ruto, Minisitiri w’Umutekano, Fred Matiang’I n’abandi.

Mu matora yabaye muri Kanama umwaka ushize, Kenyatta yatsinze Odinga ariko Urukiko rw’Ikirenga rutesha agaciro ibyavuye mu matora ruvuga ko hari uburiganya bwabayemo.

Mu matora mashya yateguwe mu Ukwakira, Odinga ntiyayitabiriye avuga ko ibyo yasabye ko bibanza gukorwa bitubahirijwe, Kenyatta aba ari we utorwa ndetse ahita arahirira inshingano ze.

Intumwa Nkuru ya leta yaburiye Odinga ko kurahira kuri uyu wa Kabiri bishobora gufatwa nk’icyaha cy’ubugambanyi, gusa ntibiramenyekana niba koko uyu muhango uza kuba.

PNG - 951.3 ko
Aba ni abazindukiye mu muhango w’irahira rya Odinga

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo