Inkingo za Ebola ziri mu igeragezwa zakiriwe i Bujumbura

Inkingo ziri mu igeragezwa za Ebola zakiriwe n’ishami ry’Umuryango w’Abibumbye ryita ku buzima mu Burundi mu ijoro ryo ku Cyumweru rishyira ku wa Mbere nk’uko iri shami ribyemeza.

Ebola iracyavugwa mu burasirazuba bwa Congo, impungenge z’uko iyi ndwara yakwirakwira henshi muri aka karere zariyongere kuva yagera mu mujyi wa Goma.

Ibihugu bituriye Congo birimo u Burundi n’u Rwanda byafashe ingamba zitandukanye mu kwirinda ko Ebola ibigeraho.

Ishami ry’umuryango w’abibumbye ryita ku buzima mu Burundi ryatangaje ko ryakiriye izi nkingo zo mu bwoko bwa VSV Zebov ku kibuga cy’indege mpuzamahanga kitiriwe Melchior Ndadaye.

Izi nkingo zigenewe ahanini abakozi bo mu nzego z’ubuzima bari ku mipaka basuzuma umuriro (kimwe mu bimenyetso bya Ebola) w’abinjira bavuye mu bihugu bituranyi.

Mu kwezi gushize, Minisitiri w’ubuzima Dr Thadée Ndikumana yatangarije radio na televiziyo by’u Burundi ko ku mipaka yabo n’ibindi bihugu baturanye bari gusuzuma abantu bose binjiye.

Icyo gihe, yavuze ko mu minsi ya vuba babona inkingo za Ebola zivuye i Geneve, bagakingira abantu barwanya Ebola ku mipaka n’abakora mu bitaro by’uturere.

Bwana Ndikumana yavuze ko kugeza ubu bidakenewe gukingira abaturage mu gihugu kuko Ebola itaragera mu Burundi.

Mu kwezi gushize kwa karindwi, inama ya OMS ishinzwe ubutabazi bwihuse yavuze ko "yemera ko hari ubucye bw’urukingo" rwa Ebola.

Mu gihe kigufi kiri imbere, byitezwe ko inkingo za Ebola zihari kuri ubu zishobora kuba zaba zihagije, ariko ntabwo byashoboka mu gihe iyi ndwara yakomeza kugaragara nk’uko abhaanga babivuga.

Nko mu ntara ebyiri zirangwamo Ebola mu burasirazuba bwa Kongo, hari abaturage barenga miliyoni 10.


Inkingo za Ebola zakiriwe mu ijoro ryo ku cyumweru i Bujumbura

@Umubavu.com





Tanga igitekerezo kuri iyi nkuru



Igitekerezo