Indege za Israel zagabye igitero  ahari ibitwaro by’ubumara bya Syria

Igisirikare cya Syria cyavuze ko izi ndege za Israel zishe abasirikare babiri ubwo zateraga ahari ibitwaro by’ubumara by’igihugu cya Syria.

Itangazo ryashyizwe ahagaragara n’igisirikare cya Syria rivuga ko ibisasu bya rokete byatewe biva muri Liban byateye agace ka Masyaf, bigahitana abasirikare babiri.
Inkuru y’ikinyamakuru cy’abarabu itaremezwa neza ivuga ko ikigo gicurirwamo ibitwaro by’ubumara ari cyo cyateweho ibisasu bya Roketi. Israel imaze kugaba ibitero bitari bike rwihishwa muri Syria gusa nta cyo ibitangazaho.

Ibi bibaye nyuma y’umusi umwe gusa abashinzwe amakuru muri Onu bavuze ko basanze Syria ari yo yagabye igitero cy’ibitwaro by’ubumara byahitanye abantu benshi mu karere kari kigaruriwe n’abarwanyi mu kwezi kwa kane. Aba bantu bakaba bagera kuri 38 barapfiriye muri iki gitero cy’i Khan Sheikhoun nkuko bivugwa na Onu. Syria ikomeje guhakana ko ikoresha ibitwaro by’ubumara.

Iperereza ry’ubumwe bw’ibihugu by’u Burayi ryo rivuga ko Syria igikomeje umugambi wayo wo gukora ibitwaro by’ubumara ibikorera mu duce twa Masyaf yirengagije amasezerano yo mu mwaka wa 2013 yo gusenya ibi bitwaro.

Israel isanzwe igaba ibitero by’indege rwihishwa mu gihugu cya Syria muri iyi myaka ishize.

Israel irashinja igihugu cya Syria guha igihugu cya Iran agace ko gukoreramo za misile zifashishwa umutwe w’intagondwa wa Hezbollah bo muri Liban.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo