Inama nkuru ya Polisi  y’u Rwanda yashyizeho imirongo ngenderwaho

Kuri yu wa kabiri tariki ya 7 Ugushyingo, ku cyicaro gikuru cya Polisi y’ u Rwanda ku Kacyiru hateraniye Inama nkuru ya Polisi y’u Rwanda, ikaba yashyizeho imirongo Polisi y’u Rwanda izagenderaho kugirango irusheho gukora kinyamwuga hagamijwe gukomeza gucunga umutekano w’abantu n’ibyabo.

Iyi nama yayobowe na Minisitiri w’Ubutabera akaba n’Intumwa nkuru ya Leta Johnston Busingye, dore ko ari nawe ufite Polisi mu nshingano ze.

Imirongo ngenderwaho yashyizweho irimo kubaka ubushobozi bw’abapolisi binyuze mu mahugurwa, gukumira, kurwanya no gukora iperereza ku byaha, kubahiriza amategeko no gutanga serivisi nziza.

Indi mirongo ngenderwaho ni ubufatanye na Polisi z’ibindi bihugu, imibereho myiza y’abapolisi no kurangwa n’ikinyabupfura byose bikaba bizatuma Polisi y’u Rwanda irushaho gukora kinyamwuga.

Iyi nama nkuru ya Polisi iterana kane mu mwaka, yari yitabiriwe na ba Minisitiri w’Ubutegetsi bw’igihugu Francis Kaboneka, Minisitiri w’Uburinganire n’Iterambere ry’Umuryango Esperance Nyirasafari, na Minisitiri w’Ubuhinzi Geraldine Mukeshimana.

Yari yitabiriwe kandi n’Umuyobozi mukuru wa Polisi y’u Rwanda Inspector General of Police -IGP) Emmanuel K. Gasana, Abayobozi muri Polisi y’u Rwanda bungirije aribo Ushinzwe ibikorwa (DIGP/Opns) Dan Munyuza n’ushinzwe imiyoborere n’abakozi (DIGP/AP) Juvenal Marizamunda.

Minisitiri Busingye yavuze ko umutekano ugaragara mu gihugu ari umusaruro wa buri mupolisi w’u Rwanda ukaba ugerwaho kubera gushyira mu bikorwa icyerekezo bahabwa n’ubuyobozi.

Yavuze ati :”Iyi nama ikwiye kwigirwamo no gufatirwamo ingamba zifatika zigamije gutuma abaturage n’ibyabo bakomeza kugira umutekano usesuye, kandi bakanizera ko uwo mutekano bazaba banawufite n’ejo hazaza.”

Yagarutse kandi ku “kubahiriza amategeko”, aho yavuze ati :”Nta muntu uri hejuru y’amategeko ; yaba umunyarwanda cyangwa umunyamahanga uri mu Rwanda, twese tugoma kubahiriza amategeko, mwe nka Polisi rero, inshingano zanyu ni ukureba ko buri wese ayubahiriza.”

Minisitiri Busingye yakomeje avuga ati :”Muri iki gihe tugezemo, umutekano ntukireberwa gusa ku gucunga umutekano w’abatu n’ibyabo, ugaragarira mu buryo abaturage babayeho, kwihaza mu biribwa, kwita no kurengera ibidukikije, ubuzima, kubahiriza uburenganzira bwa buri wese n’ibindi, kandi ibi bigerwaho hahujwe imbaraga.”

Yasoje avuga ko Disipuline no gutanga serivisi nziza ari bimwe mu biranga igipolisi cy’umwuga, anavuga ko Guverinoma y’u Rwanda izakomeza gufasha Polisi y’u Rwanda ngo igere ku nshingano zayo.

Minisitiri Mukeshimana, yavuze ko inzego z’umutekano zagize uruhare runini mu gufasha urwego rw’ubuhinzi, cyane cyane zifasha abahinzi.

Yaboneyeho umwanya wo gusaba ubufatanye “bufatika ku kurinda ko amatungo ajya ku misozi” kugirango hirindwe ikwirakwizwa ry’indwara z’amatungo.

Minisitiri Mukeshimana yavuze ko mu mezi ane gusa, u Rwanda rwahombye Miliyari 5 z’amafaranga y’u Rwanda kubera indwara z’amatungo n’iz’ibihingwa zibasiye intara y’Uburasirazuba.

Yagarutse kandi ku bujura bw’imbuto n’inyongeramusaruro, aho yavuze ko hari ababyinjiza mu gihugu mu buryo butemewe n’amategeko, ndetse n’ababigurisha abaturage ku giciro cyo hejuru, asaba ko ibi bihagarara.

Minisitiri Kaboneka nawe yagejeje ku bitabiriye Inama nkuru ya Polisi ibikenewe mu bufatanye bwa Polisi na Leta mu guteza imbere imiyoborere myiza, aho yavuze ko ubufatanye na Polisi bukenewe muri gahunda zo gukumira ibyaha bitaraba no gushishikariza abaturage kwicungira umutekano.

Minisitiri Nyirasafari we yagarinije abapolisi ku musanzu wa Polisi y’u Rwanda mu gukumira no kurwanya ihohoterwa rishingiye ku gitsina n’irikorerwa abana, avuga ko hari byinshi byagezweho, ariko ko urugendo rukiri rurerure kugira ngo riranduke burundu.

Yasoje ashimira Polisi y’u Rwanda uruhare yagize muri gahunda ya #HeForShe yo gushyigikira no kwigisha amahame y’uburinganire n’ubwuzuzanye.

IGP Gasana yavuze ko imihindagurikire y’ibyaha ituma Polisi y’u Rwanda nayo ifata izindi ngamba ikanongerera ubumenyi n’ubushobozi abapolisi bayo kugirango bashobore guhangana nabyo, haba mu gihugu imbere no hanze yacyo aho bajya kubungabunga amahoro.

Iyi nama ikaba yari iteraniyemo abapolisi hafi 300 barimo abayobozi bakuru ba Polisi y’u Rwanda kuva ku rwego rw’igihugu, abayobora amashami atandukanye ya Polisi, abayobora amashuri ya Polisi y’u Rwanda, abayobora Polisi y’u Rwanda kuva ku rwego rw’Intara n’Umujyi wa Kigali ndetse no ku rwego rw’uturere, n’abahagarariye abapolisi bato bakorera mu turere no mu mashami yihariye ya Polisi y’u Rwanda.

Inama nkuru ya Polisi iterana kane mu mwaka, ikarebera hamwe uko umutekano wifashe, igafata n’ingamba zo kuwubumbatira no guteza imbere imibereho myiza y’abapolisi.



Tanga igitekerezo kuri iyi nkuru



Igitekerezo