Impunzi z’Abarundi i Kamanyola ziri hagati y’urupfu n’umupfumu

Nyuma y’Icyumweru kimwe gusa Impunzi z’Abarundi ziri mu Gace ka Kamanyola mu Burasirazuba bwa Repubulika Iharanira Demokarasi ya Congo barashweho n’inzego z’Umutekano z’iki gihugu 39 bakahasiga ubuzima abandi barenga 120 bagakomereka ; ngo ubu ikigezweho ni uko zigiye kubarurwa nyuma zikimurirwa muri Teritwari ya Fizi mu Ntara ya Kivu y’Amajyepfo.

Icyemezo cyo kwimurira izi mpunzi z’Abarundi muri Teritwari ya Fizi igizwe n’uduce twigaruriwe n’Inyeshyamba zo mu mutwe wa Maï Maï gishobora gutuma zongera kwibasirwa n’ubwicanyi cyane cyane ko uyu mutwe ushinjwa kwica ,gufata ku ngufu ngo gusahura abaturage.

Ibyo kuba aha hantu hazimurirwa impunzi z’Abarundi hadafite umutekano byemejwe n’Umuyobozi wungirije w’Itara ya Kivu y’Amajyepfo ,Gabriel Kalonda wabwiye Radio Mpuzamahanga y’Abafaransa ko igikorwa cyo kwimura izi mpunzi kigomba kuba gitegereje gato kuko ingabo za Leta zigihanganye n’Umutwe wa Maï Maï.

Uyu mwanzuro wo kwimura impunzi z’Abarundi mu gace ka Kamanyola ukaba uje nyuma y’uko Abanye-Congo bagatuyemo ndetse na Sosiyete Sivile bagaragaje ko badashaka kubana n’Abarundi kuko ngo bateza umutekano muke bityo byaba ari kimwe n’igisasu baba biziritseho.

Ku wa Gatanu tariki 15 Nzeri 2017 nibwo Abarundi 34 bishwe barashwe n’inzego z’umutekano za Congo abandi 124 bagakomereka mu Mujyi wa Kamanyola mu Burasirazuba bwa Repubulika Iharanira Demokarasi ya Congo ,gusa Leta ya Congo ivuga ko abarundi bishwe atari impunzi.

Umuryango w’Abibumbye n’abanyamakuru bakorera muri aka gace kabereyemo ubu bwicanyi ,bavuze ko Igisirikare cya Congo cyarashe urufaya rw’amasasu ku mpunzi z’abarundi ziri mu nkambi ya Kamanyola.

Umuryango w’Abibumbye muri iri tangazo washimangiye ko aba barundi baguye mui bushyamirane hagati yabo n’inzego z’umutekano za Congo.

Minisitiri w’Ububanyi n’Amahanga w’u Burundi, Alain Aime NYAMITWE abicishije ku rukuta rwe rwa Twitter yasabye ko hagaragazwa ukuri ku byabaye ku mpunzi z’abarundi ziri mu nkambi ya Kamanyola.

Gabriel Habineza/Umubavu.com



Tanga igitekerezo kuri iyi nkuru



Igitekerezo