Impunzi 301 z’abarundi zatahutse ziva muri Tanzania

General de brigad Emmanuel Maganga uyoboye intara ya Kigoma yavuze ko Imiryango 97 igizwe n’abantu 301 ari yo yatahutse iva mu nkambi ya Nduta mu gihugu cya Tanzania.

Muri iyi miryango 97, mirongo itandatu n’iyo mu ntara ya Ruyigi iyindi mirongo itatu n’irindwi ni iy’ i Bujumbura. Abayobozi babiri b’ibi bihugu byombi (Tanzania n’u Burundi) nibo bari bahagarariye iki gikorwa kizakomeza kugeza mu mpera z’uyu mwaka.
Izi mpunzi zatwawe mu modoka nini eshanu zikaba zahise zijyanwa mu nkambi y’agateganyo iri muri komine Gisuru mu ntara ya Ruyigi iri mu burasirazuba bw’igihugu cy’ u Burundi.
Mu nama yabaye ku wa kabiri, Reta y’u Burundi n’ishyirahamwe rifasha impunzi ku isi HCR bashyize umukono ku masezerano yerekana uburyo izi mpunzi z’abarundi zizacyurwa zikava mu nkambi yo muri Tanzaniya. Nkuko byatangajwe na Minisitiri w’umutekano mu gice cyo hagati mu gihugu Pascal Barandagiye, impunzi zakabakaba ibihumbi 12 ziri mu nkambi zo muri Tanzaniya zizaba zatahutse mbere yuko uyu mwaka ushira.
Minisitiri Barandagiye yavuze kandi ko muri bo abarenga 6 800 bazagera mu gihugu muri uku kwezi kwa cumi.
Itahuka ry’izi mpunzi rije kandi rikurikira inama yaherukaga kubera i Dar-Es-Salaam mu gihugu cya Tanzania yari yahuje u Burundi, ishami rya Onu ryita ku mpunzi ku isi HCR ndetse n’igihugu cya Tanzania aho bumvikanye kuri gahunda yo gutangira gucyura izi mpunzi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo