Impinduka zikomeye  muri Kaminuza y’u Rwanda

Kuva Kaminuza y’u Rwanda yashyirwaho mu mwaka wa 2013 isimbura icyahoze ari Kaminuza nkuru y’u Rwanda, ubu ikomeje kurangwamo impinduka zishingiye ku guhindura amazina y’amashami yayo ndetse no kwimura ibyicaro bimwe na bimwe by’amakoleji yayo yabarizwaga ahantu hatandukanye.

Kaminuza y’u Rwanda yakomeje gutangaza ko ishaka guhuza no kwimura amwe mu mashami yayo kugira ngo hakomeze gushakwa inzira y’ireme ry’uburezi ridasiba gukemangwa, bityo bikaba birangiye bishyizwe mu bikorwa kuko ubu Koleji yigishaga amasomo y’ubumenyi rusange, CASS (College of Arts and Social Sciences) yakomatanyijwe n’iyigishaga ibijyanye n’ubukungu, CBE (College of Business and Economics) bibyara Koleji nshya yigisha amategeko, ubukungu n’imiyoborere, CLEG (College of Law, Economics and Governance). Iyi koleji ikaba ifite icyicaro I Gikondo.

Koleji y’Ubuvuzi n’Ubumenyi mu by’ubuzima, CMHS (College of Medicine and Health Sciences) yo nta cyahindutse gusa ikazaba ifite icyicaro I Kigali kimwe na koleji yigisha iby’ubumenyi n’ikoranabuhanga, CST (College of Science and Technology) nayo izaguma kugira icyicari I Kigali.

Koleji y’uburezi kandi , CE (College of Education) nayo yongereweho imicungire y’ububiko bw’inyandiko biba CELS (College of Education and Library Sciences) bikazagira icyicari I Rukara naho koleji yigishaga ibijyanye n’ubuhinzi n’ubumenyi mu buvuzi bw’amatungo, CAVM (College of Agriculture and Veterinary Sciences) nayo ikaba yarongeweho ibijyanye n’ibidukikije, ihinduka CAEVM (College of Agriculture, Environment and Veterinary Medicine) ikazakomeza kugira icyicaro I Busogo. Nyuma y’izi mpinduka ubuyobozi bwa Kaminuza kandi bwavuze ko hari amashami amwe n’amwe ya Kaminuza y’u Rwanda yabarizwaga mu ntara azafungwa.

Umuyobozi Wungirije wa Kaminuza y’u Rwanda ushinzwe amasomo n’ubushakashatsi, Prof Nelson Ijumba, yavuze ko mu hantu higiraga amwe mashami ya kaminuza yavanyweho harimo nka Byumba, Kibungo, Kabgayi na Nyamishaba, abanyeshuri bose bakaba basabwa kwimuka bitarenze Ukwakira ubwo amasomo y’uyu mwaka w’amashuri azaba atangiye.

Vuba aha byatangajwe ko Kaminuza y’u Rwanda (UR) n’Ikigo cy’ubushakashatsi n’iterambere ry’inganda (NIRDA), bigiye kuvanwa i Kigali bikajyanwa mu ntara mu mijyi ya kabiri yunganira umurwa mukuru w’u Rwanda.

Abanyeshuri bamwe na bamwe bagize icyo avuga kuri izi mpinduka
Uyu ni umwe mu bo twaganiriye wagize ati” izi mpinduka ziduteje igihombo kuko tutabibwiwe mbere none tukaba twari twarishyuye amazu yaho twari dusanzwe tuba”.

Si uyu gusa kuko n’abandi twaganiriye batubwiye ko batewe impungenge no kuba bavanwa i Huye ahari amacumbi ahagije bakabajyanwa aho bazajya bikodeshereza kandi binabagoye cyane.

Umwe yagize ati :"Ibi bintu bya kaminuza imwe rwose ntiturabona ikiza cyabyo ahubwo tubona ahari ikigamijwe ari ugushaka guhima ab’i Huye gusa kuko rwose hari uburyo bwose bushoboka bwo kuhigira , ari amacumbi ahagije, ari n’amashuri ahagije arahari bityo ntituzi igituma Huye igumya gusubizwa inyuma bene aka kageni”.

Nubwo aba banyeshuri batandukanye bavuga ibi, Itegeko rishyiraho Kaminuza imwe ryasohotse mu mwaka wa 2013 ubwo ryanatangiraga gukurikizwa hashyirwaho iyi Kaminuza imwe n’amashami yayo.

Itegeko N°71/2013 ryo kuwa 10/09/2013 niryo rishyiraho kaminuza imwe rikaba ryarasohotse mu igazeti ya leta mu mwaka wa 2013. Iri tegeko rinagena inshingano, ubu basha, imiterere n’imikorere by’iyo kaminuza, nk’uko bigaragara mu igazeti nyirizina yasohotse kuwa mbere tariki ya 23 Nzeri 2013.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo