Impamvu zahagaritse abayobozi bakuru batanu ba REB zamenyekanye

Nyuma y’aho abayobozi batanu ba REB bahagaritswe n’Inama y’Abaminisitiri yayobowe na Perezida Kagame; Minisitiri w’Uburezi, Dr Eugène Mutimura, yatangaje ko ari umwanzuro wafashwe bitewe n’uko batubahirizaga inshingano zabo ziri muri gahunda yo guteza imbere uburezi mu Rwanda.

Learn how to Thrive

Inama y’Abaminisitiri yateranye kuri uyu wa Gatatu, yahagaritse ku kazi abayobozi bakuru batanu mu Kigo gishinzwe Guteza imbere Uburezi mu Rwanda (REB), barimo Dr. Musabe Joyce wari ukuriye Ishami ry’Integanyanyigisho n’Imfashanyigisho na Dr. Tusiime Rwibasira Michael wari ukuriye Ishami rishinzwe Ibizamini n’Isuzumabumenyi.

Minisitiri w’Uburezi, Dr Eugène Mutimura, yatangaje ko impamvu aba bayobozi birukanwe, zishingiye ku kuba impamyabumenyi z’abarangije amashuri zitinda kubageraho kandi zigakorerwa mu mahanga mu gihe leta yari yarihaye intego ko zigomba kujya zikorerwa mu gihugu.

Mu mwiherero w’abayobozi bakuru b’igihugu wabaye mu 2017 iki kibazo cyaragaragajwe ndetse gifatwaho umwanzuro nkuko byatangajwe n’uwari Minisitiri w’Uburezi.

Muri Werurwe 2017, Dr Papias Malimba wayoboraga Minisiteri y’Uburezi yavuze ko Leta yamaze gufata ingamba ko itazongera gukoresha impamyabushobozi z’abarangije Kaminuza mu mahanga ahubwo ko mu rwego rwo kwimakaza ibikorerwa mu Rwanda nazo zigiye kujya zihakorerwa.

Ati “Twafashe ingamba zo guhagarika kujya gukoresha diplôme hanze ahubwo turi kugerageza gushyira hamwe ibigo byo mu Rwanda ngo bijye bitanga izi serivisi.”

Minisitiri Mutimura yavuze ko iyirukanwa ry’abayobozi bakuru ba REB ryatewe n’uko izi diplôme zakorerwaga mu mahanga kandi zigatinda kugera ku banyeshuri.

Mineduc iherutse kwemeza ko zizajya zigera ku banyeshuri mu gihe kitarenze amezi atandatu.

Indi mpamvu y’uku guhagarikwa kw’abayobozi ni ijyanye n’ibitabo bifasha abanyeshuri byamaraga amezi nk’umunani bitaragera ku bo bigenewe kandi bigomba kwifashishwa nk’imfashanyigisho.

Ibi biriyongera ku kuba hari ibyakorerwaga hanze y’igihugu kandi byari bikwiye gukorerwa mu Rwanda.

Mu masaha y’igitondo kuri uyu wa Kane, Mineduc n’ibigo biyishamikiyeho byaramukiye mu nama mu muhezo, isobanura impamvu y’uku guhagarikwa kw’abayobozi kugira ngo abandi barusheho kunoza imikorere yabo.

Usibye Dr. Musabe Joyce na Dr. Tusiime Rwibasira Michael, abandi bayobozi bahagaritswe harimo Mujiji Peter wari Umuyobozi Mukuru w’Ishami rishinzwe Imirimo Rusange; Karegesa Francis wayoboraga Ishami rishinzwe Imari na Bagaya Rutaha wari Umuyobozi w’Ishami rishinzwe Amasoko.

@Umubavu.com


Travel for Free!


Tanga igitekerezo kuri iyi nkuru



Igitekerezo