Imodoka 3 zibwe muri Afurika y’Epfo zafatiwe  mu Rwanda

Ku wa 19 Nzeri uyu mwaka Polisi y’u Rwanda yashyikirije iy’Igihugu cya Afurika y’Epfo imodoka eshatu zahibwe mu bihe bitandukanye zikaza gufatirwa mu Rwanda.

Hafashwe RANGE ROVER ifite pulake UAV 147C. Yafatiwe ku mupaka wa Gatuna, mu karere ka Gicumbi ku itariki 6 Werurwe uyu mwaka. Yafatanywe uwitwa Saleh Bashir washakaga kuyinjiza mu Rwanda aturutse muri Uganda.

Hari kandi FORTUNER yambaye pulake CY 19LV GP. Uwitwa Mohamed Salim ni we wayifatanywe ku itariki 30 Gicurasi umwaka ushize agira ngo ayinjize mu Rwanda aturutse mu Burundi. Yafatiwe ku mupaka wa Ruhwa, mu karere ka Bugesera.

Indi ni TOYOTA LAND CRUSER ifite pulake TZ 53 CGM. Iyi yo yafatiwe ku mupaka wa Rusumo, mu karere ka Kirehe ku itariki 11 Gashyantare umwaka ushize. Yafatanywe Kompanyi yo muri Tanzania yitwa SIMBA DRILLING CO. Ltd.

Umuyobozi wa Polisi Mpuzamahanga, Ishami ry’u Rwanda, Assistant Commissioner (ACP) Peter Karake ni we washyikirije izo modoka abaje kuzakira barimo Abapolisi bo mu gihugu cya Afurika y’Epfo bayobowe na Captain Conradie ; bakaba bari hamwe na babiri muri ba nyirazo.

ACP Karake yabwiye Itangazamakuru ko ifatwa ryazo ryatewe n’imikoranire myiza ya Polisi y’u Rwanda n’iya Afurika y’Epfo ndetse na Polisi zo mu bihugu byo muri aka karere ka Afurika binyuze mu guhanahana amakuru hifashishijwe Ikoranabuhanga rya Polisi Mpuzamahanga rya I-24/7.

Yagize ati,"Abari bazitwaye ntibahiriwe no kuzicisha mu Rwanda bazijyanye mu bindi bihugu kuko bafatiwe kuri imwe mu mipaka iruhuza na bimwe mu bihugu byo muri aka karere bagerageza kuzinjiza mu gihugu. Abiba imodoka n’ibindi bintu bitandukanye bajye babijyana cyangwa babicishe ahandi hatari mu Rwanda. Ibi bibere buri wese urugero ko uzagerageza kuhanyuza ibyibano azafatwa.

Yagiriye inama abagura imodoka zakoze kujya basuzuma ko nomero za shasi na moteri n’iziri ku byangombwa by’imodoka yaguzwe bihuye kugira ngo birinde kugwa mu gihombo cyo kuba bagura iyibwe.

Nyiri Fortuner, Peter Cawood yashimye Polisi y’u Rwanda n’iy’igihugu cye agira ati,"Ndishimye bitagira urugero kuba imodoka yanjye yarafashwe nkaba ndetse nyishyikirijwe. Mu by’ukuri siniyumvishaga ko ishobora gufatwa ; ariko Polisi y’u Rwanda yarabishoboye."

Mu ijambo rye ry’ishimwe nyiri TOYOTA LAND CRUSER, Kobus Barnard yagize ati,"Ibyo ari byo byose iyi modoka yacishijwe mu bindi bihugu mbere y’uko ifatwa. Kuba yarafatiwe ku mupaka w’u Rwanda bigaragaza ubunyamwuga bwa Polisi yarwo. Ndayishima kuba ikurikirana ikibazo cy’umuturage ititaye ku nkomoko ye."

Nyuma yo gusinya impapuro z’ihererekanya ry’izo modoka eshatu, Capt Conradie yagize ati,"Ifatwa ry’ibi binyabiziga ni igihamya ko igihugu cyose umunyabyaha yajyamo yafatwa Polisi ziramutse zikoranye neza."



Tanga igitekerezo kuri iyi nkuru



Igitekerezo