Ihohoterwa riri gukorerwa bamwe mubanyarwanda rigomba guhagarara mu maguru mashya

None kuwa 8 Kanama 2017 umunyamabanga Mukuru wa PS Imberakuri bwana MWIZERWA Sylver yagiranye ikiganiro n’ikinyamakuru intambwe.net aho avuga ko yamagana byimazeyo ihohoterwa rikomeye rikomeje kwibasira bamwe mu banyarwanda cyane cyane abagaragaje ibyiyumviro byabo by’uko batazitabira icyo we avuga ko ari ikinimico yiswe amatora aheruka kuba mu Rwanda.

Bwana MWIZERWA agaruka cyane kukibazo kimaze iminsi kivugwa cy’abazunguzayi,inzererezi ndetse n’abasabiriza, aha avuga ko uburyo bahutazwa we n’ishyaka ryabo batabyemera,ashimangira ko ihutazwa ryabo ryatangiye kera aho atanga ingero nko kuwa 7 gicurasi 2016 ubwo Theodosia UWAMAHORO wakoraga akazi ko gutembereza uducuruzwa duke nibwo yishwe n’inzego zishinzwe umutekano ndetse no mu ijoro ryo kuwa 28 Mata 2017 abana b’inzererezi basanzwe n’inzego zishinzwe umutekano bakorerwa igikorwa cya kinyamaswa,ubwo izo nzego zabatwikiraga muri ruhurura zikoresheje esanse aribwo babiri muri bo bahasigaga ubuzima ,umwe agakomereka bikomeye.

Yabwiye kandi ikinyamakuru intambwe.net ko inama yo kuwa wagatanu tariki ya 23 Kanama 2017,ari inama iteye amakenga ,avuga ko iyo nama yahuje inzego zikomeye zo mu mujyi wa Kigali zirimo iza gisirikare,iza gipolisi ndetse n’izibanze kuva ku rwego rw’umujyi kugera kurwa akagari bose basaga 300, iyi nama ikaza kwemeza ko imbaraga za gipolisi n’igisirikare aribyo bigomba gukoreshwa mu kurandura ubuzunguzayi ndetse n’abasabiriza,aho inzego nkuru muri izi zivuga ko ari ukurwanya umwanda n’akajagari,ibi akaba avuga ko ari ubwishongozi bw’abijuse kuko aho ahamya ko abantu bahembwa imisoro y’ibyavuye mu mitsi ya rubanda badakwiye guhindukira ngo babafatire ibyemezo bibakandamiza bibibicisha inzara,kuri we ngo biteye agahina kubona abakene bishakira ubuzima mu gihugu cyabo basigaye bitwa umwanda nk’uko bavugako barwanya umwanda !
Bwana MWIZERWA atunga agatoki ishyaka FPR aho avuga ko yo n’abambari bayo babaye bagarutse ibuntu bakwibuka amateka bityo bakabona ko bamwe muri abo bazunguzayi n’abasabiriza,ari abagiye babura ababyeyi babo mu bibazo byagwiriye u Rwanda bityo ubuzima bukababana bubi bakiri bato bityo bakabushakira aho,ababuze amashuri,abo za gacaca zateje imitungo y’iwabo,abimuwe ntibabone ingurane ikwiye,abambuwe amasambu bicaragamo bagashakiramo amaramuko,abagenda barandurirwa imyaka,abasenyerwa amazu bari bamaze gutaho ayabo,abana barangije amashuri bakabura akazi,abategetswe guhinga igihingwa kimwe kikarumba,inzara muri rusange.....

Kubera ibi byose akavuga ko ntagushidikanya ko ubuzunguzanyi bwongerewe cyane na Leta itarabashije kumenya cyangwa yakoze nkana ibyavuzwe haruguru,bityo ko izo nzego zakarebye ko uruhare runini ari urwayo mu gihe Leta barimo itabashije kurwanya ubukene n’ibyo bibazo byose byatumye abantu babaho uko yo itabyifuza,aho kubigereka kuri rubanda rwikeneye.

Mwizerwa avuga ko nubwo izo nzego zivuga ko abo bacuruzi bato bubakiwe amasoko,uretse ko atari nabyo kuko ayo masoko n’ubundi yagiwemo n’abafite igishoro gifatika,kuko umuzunguzayi utwaye utuntu mu ntoki ataturambika ngo tugaragare,ikindi nabo bigaragariza ko kubera ubushobozi bwabo batazirikirwa mu masoko ntacyo bacuruzamo kigaragara
Aha rero asanga ko byonyine kuba bivugwa ko hubatswe amasoko,ntagere kubo yubakiwe,adahwanye n’umubare ndetse ntibanahabwe ubufasha bwo gushora ahubwo bagakomeza guhigwa,aha ngo asanga ikibazo ahubwo kirenze ikivugwa ku minwa gusa.
Kuri iki kibazo rero avuga ko ishyaka ryabo ribona inyungu z’abantu bamwe arizo zashyizwe imbere kurusha uko hagashyizwe inyungu rusange imbere,ngo ari inyungu rusange babona nta munyarwanda wagahohotewe kariya kageni kandi Leta ibizi neza ko ari gukora akazi ahahira abana harimo n’uduhinja ndetse n’abana biga,mu gihe Leta ntacyo yakoze ngo ibereke koko aho bagomba kubonera amaramuko n’imiryango yabo,avuga ko yarahabahaye koko nabo batakwemera kwirirwa bamwe bakubitwa,bafungwa,bamburwa,bicwa,abandi bakagongwa n’amamodoka bahunga inzego zibiruka inyuma,ndetse n’abafunzwe iyo barekuwe basanga imiryango harimo utwana basize yarahazahariye ;
Bwana MWIZERWA Sylver Umunyamabanga Mukuru wa PS Imberakuri yagarutse ku ifatwa n’ifungwa ryakorewe abo mu mashyaka atavuga rumwe n’ubutegetsi aho yavuze kuri bwana Boniface Twagirimana VP wa FDU Inkingi na bagenzi batandatu bafunze ndetse na VP wa PDP Imanzi bwana Kayumba JMV wafashwe akaza kurekurwa arayemo,aha avuga ko aba bantu bishobora kuba ku mpamvu za politike kuko ari amashyaka kimwe n’iryabo PS Imberakuri batariye umunwa mukugaragaza ko badashyigikiye ihindurwa ry’itegeko nshinga ndetse nicyo avuga ko ari ikinamico y’amatora yahise,yongera avuga ko ibyaha bariya baregwa aribyo nubwo we atekereza ko ari ukubahimbira ko byaba bibabaje kubona abanyarwanda bari bariyemeje politike yo guhindura ibintu mu mahoro noneho baba bafashe inzira avuga nk’iyo FPR yakoresheje y’intambara,avuga ko iyi nzira FPR iyizi kurusha bariya ahubwo yo ubwayo yagafashe igihe cyo kwegera no kumva abana b’u Rwanda bose bagasangira ibyiza by’igihugu mu mahoro aho guhigana no guhora mu ntambara z’urudaca,bwana MWIZERWA avuga ko FPR ibizi neza ko igisubizo cy’amahoro arambye ariyo igifite aho avuga ko aho kwica gitera bice ikibimutera,kuko gufunga n’ibindi atari umuti urambye.Cyakora ngo kuri bo muri PS Imberakuri bifuza amahoro arambye azira imeneka ry’amaraso akaba ariyo mpamvu bashyira imbere kandi kandi bakaba babona ko urubuga rwa politike ari rwo rukwiye kuruta byose,uvuze ibitagenda ntabe umwanzi ngo ahigwe kandi rubanda igahabwa umwanya uhagije kandi wisanzuye wo kwihitiramo uwo bifuza wabayobora.

Yarangije ikiganiro avuga ko ishyaka ryabo ritishimiye kandi uko umuryango wo kwa RWIGARA uri gufatwa muri ibi bihe,aho avuga nka Diane washatse kwiyamamaza nyuma NEC ikavuga ko yibye abayoboke ba PS Imberakuri bamwe banapfuye aha avuga ko nk’uko bene ubwite babyitangarije bikwiye ko hagomba kubaho uburyo bwo kwisanzura muri byose kandi umunyarwanda akagira ijambo aho bidakwiye ko ukurusha ingufu bikwiye ko koko agutobera ari epfo,ahubwo ko hakwiye ingufu z’abaturage mu kugaragaza icyo bifuza cyazabagirira akamaro,bityo ngo ishyaka ryabo rikaba ryamaganye iri totezwa ry’uyu muryango,ihutazwa ry’abazunguzayi nabo ahamya ko bavuze ko badashobora kuzatora kubera ko batatora ishyaka ryababujije amahwemo.

Anamagana kandi ifatwa n’ifungwa ry’abayoboke yavuze,aho avuga ko ibi byose ari impamvu za politike,aranakangurira abayoboke ba PS Imberakuri kudacika intege mu gukomeza gushimangira imigambi n’intego by’ishyaka ryabo,ndetse n’izindi mpirimbanyi zose gukomeza urugamba rw’amahoro mu ituze,anasaba Umuryango FPR Inkotanyi kureba kure ukibuka u Rwanda n’abanyarwanda kurusha inyungu zabo bwite,bakanibuka ko umuti w’amahoro arambye kugeza ubu ari wo bawufite kandi ko uteri mu gufunga,gucecekesha no guhohotera abatavuga rumwe nayo.



Tanga igitekerezo kuri iyi nkuru



Igitekerezo