Icyo Diane Rwigara  avuga ku byaha we n’abo mu muryango we bashinjwa

Diane Rwigara yavuze ko we n’Umuryango we bagikomeje kwitaba Ubugenzacyaha ku byaha bakurikiranyweho.

Mu kiganiro yagiranye na Radio Ijwi ry’Amerika ku wa Mbere tariki 18 Nzeri 2017,Diane Rwigara yavuze ko we ashinjwa gukoresha imikono y’abantu bapfuye ubwo yashakaga abamusinyira kugira ngo abone uko yiyamamariza kuyobora u Rwanda , icya kabiri ngo ni ibintu yagiye avuga kuri kuri Leta ngo biragaragara ko yashakaga kugumura abaturage naho icya 3 ni Muvoma yashinze aho yabwiwe ko ari yashinze ikintu gisa n’umutwe wa politiki.

Agaruka ku byaha Murumana Anne Rwigara ashinjwa ,Diane Rwigara yagize ati’’ Bagenda bahinduranya ,uyu munsi bavuga ko bagushinja iki undi munsi bakavuga ikindi .Nanjye bagiye babyongeraho ,byatangiye ari amasinyatire gusa ,bongeraho amagambo navuze ngo nshaka kugumura abaturage nyuma bongeraho iriya Muvoma nashinze’’

Diane Rwigara avuga ko mbere yaregwaga kuba yarasinyishije abantu bapfuye none ngo ubu akaba abwirwa ko yasinyishije abantu batigeze babaho.

Ku bijyanye na Murumuna we Anne kandi Diane Rwigara yavuze ko ubu ashinjwa ibaruwa yandikiye Ikinyamakuru Jeune Afrique ise ubabyara ariwe Rwigara Assinapol akimara kwitaba Imana azize impanuka ku ya 04 Gashyantare 2015, nyuma yo kugongwa n’ikamyo.

Diane Rwigara agaruka ku byo nyina umubyara,Adeline Rwigara ashinjwa yavuze ko hari ubutumwa bugufi basanze muri Telefone ye igendanwa butavuga neza Leta.

Uyu mukobwa kandi ashimangira ko umutekano we n’umuryango we utifashe neza ndetse ko ajya gushaka kwiyamamariza kuyobora u Rwanda ngo yari azi neza ko ibiri kuba bizabaho.

Ashimangira ko mbere y’uko atabwa muri yombi hari hamaze iminsi hashakishwa abantu bo kumushinja ati’’ Donc ibyo bashaka ni ukumfunga bakoresheje ibyaha bahimbye’’

Diane Rwigara wakunze Kugaragaza no atishimira uburyo u Rwanda ruyobowe muri iki kiganiro kandi yongeye gushimangira ko mu Rwanda nta rwego na rumwe rwigenga bityo ko ari ukurega uwo uregera.

Ku wa Mbere tariki 4 Nzeri 2017, nibwo Diane Rwigara n’abo mu muryango we batawe muri yombi na Polisi y’u Rwanda yabakuye mu rugo iwabo ,mu Kiyovu mu mujyi wa Kigali ku ngufu, nyuma y’uko bari banze kwitaba inzego z’ubugenzacyaha zari zirimo kubakoraho iperereza ku byaha bakurikiranyweho.

Umunsi ukurikiyeho Polisi ikaba yarabagaruye mu Rugo iwabo nyuma yo kubabaza ibibazo ku byaha bakurikiranyweho.

Polisi y’u Rwanda ivuga ko Diane Rwigara akurikiranyweho icyaha cyo gukoresha ‘inyandiko mpimbano mu gihe yahimbaga imikono ashakisha umubare yasabwaga na Komisiyo y’Igihugu y’Amatora.’

Abandi bo mu muryango we bo bakurikiranyweho ibijyanye no kunyerereza imisoro binyuze mu ikompanyi yanditse ku muryango wabo.

Ibijyanye n’impapuro mpimbano kuri Diane Rwigara byamenyekanye ku mugoroba wo ku wa Gatanu tariki 7 Nyakanga, ubwo Komisiyo y’Amatora (NEC) yemezaga ko Perezida Paul Kagame wari umukandida wa FPR Inkotanyi, Dr. Habineza Frank wa Democratic Green Party na Mpayimana Philippe wigenga, aribo bazahatana mu matora ya Perezida wa Repubulika yabaye ku wa 3 no ku wa 4 Kanama 2017.

Barafinda Sekikubo Fred, Shima Diane Rwigara na Mwenedata Gilbert ntibemerewe ku mpamvu zirimo gutanga imikono irimo iy’abapfuye.

NEC yatangaje ko Diane Rwigara ku ilisiti y’abamusinyiye hariho abantu bapfuye aribo ; Rudahara Augustin wari ufite nimero y’indangamuntu 1196380003823002, waguye mu bitaro bya Kibagabaga tariki ya 16 Mata 2016, agashyingurwa tariki ya 17 Mata 2016, Maniraguha Innocent wari ufite nimero y’Indangamuntu 1199898000414103 na Byiringiro Desire ufite nimero y’indangamuntu 119780002226035. Ibi Diane akaba yarabihakanye avugako ari ibinyoma

Yavuze kandi ko Diane Rwigara afatanyije n’umukorerabushake wa Komisiyo y’Igihugu y’Amatora mu Karere ka Rulindo, biganye imikono y’abantu bagasinyira abagera kuri 26 imyirondoro yabo ikuwe ku makarita y’itora uwo mukorerabushake yari afite.

Ingingo ya 609 mu gitabo cy’amategeko ahana ibyaha mu Rwanda, ivuga ko “Umuntu wese uhimba cyangwa uhindura mu buryo ubwo ari bwo bwose inyandiko, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, ahanishwa igifungo kirenze imyaka itanu (5) kugeza ku myaka irindwi (7) n’ihazabu y’amafaranga y’u Rwanda kuva ku bihumbi magana atatu (300.000) kugeza kuri miliyoni eshatu (3,000,000)."

Umubavu.com



Tanga igitekerezo kuri iyi nkuru



Igitekerezo