Icyemezo cya  Kaminuza y’u Rwanda  cyo gufunga amashami yayo  cyatewe utwatsi

Inama Nkuru y’Amashuri makuru na Kaminuza (HEC) yasohoye itangazo rinenga Kaminuza y’u Rwanda (UR) amavugurura yakoze muri za Koleji ziyigize, ikazitangaza bitanyuze mu nzira ziteganyijwe n’amategeko.

Muri uku kwezi nibwo UR yatangaje ko amakoleji yari asanzwe ayigize azagabanywa akava kuri atandatu akagirwa atanu ndetse hamwe mu bigishirizwaga hagafungwa, abanyeshuri bakajya kwigira ahandi.

Kuri uyu wa Gatatu, tariki ya 13 Nzeri 2017, Umuyobozi wa HEC, Dr Emmanuel Mugisha, yandikiye UR ko izo mpinduka zatangajwe hirengangijwe ko zagombaga kubanza kwerekwa HEC ikazisuzuma.

Muri iyo baruwa hari ahagira hati “Hashingiwe ku mpinduka ziteganywa muri za Koleji za UR zatangajwe mu itangazamakuru kuwa 11 Nzeri 2017. Turabyumva ko UR iri muri gahunda y’amavugurura no kwimura za koleji zayo. Izo mpinduka ziteganywa ntizigezwe zishyikirizwa HEC ngo izisuzume , ifate icyemezo.”

Ikomeza yibutsa ingingo ya 20 y’Itegeko no 01/2017 ryo ku wa 31/01/2017 rigena imiterere, imitunganyirize n’imikorere by’Amashuri Makuru, ivuga ko gufungura, gufunga cyangwa kwimurira ahandi Koleji, ishuri, ishami cyangwa ikigo cy’ubushakashatsi bishamikiye ku ishuri rikuru rya Leta, irihuriweho na Leta n’abikorera ku bw’amasezerano cyangwa iryigenga byemezwa na Minisitiri.

Kuw’ibyo, HEC yasabye UR kuyizanira amavugurura iteganya kugira ngo asuzumwe afatirwe icyemezo.

Mu mpinduka zari zatangajwe ariko HEC ivuze ko zitasuzumwe ngo zemezwe mu nzira zikwiye UR yafashe icyemezo ko Koleji yigishaga amasomo y’ubumenyi rusange (CASS -College of Arts and Social Sciences) yakomatanyijwe n’iyigishaga ibijyanye n’ubukungu, CBE (College of Business and Economics) bibyara Koleji nshya yigisha amategeko, ubukungu n’imiyoborere, CLEG (College of Law, Economics and Governance) ;

Koleji y’Ubuvuzi n’Ubumenyi mu by’ubuzima, CMHS (College of Medicine and Health Sciences) yo nta cyahindutse kimwe na Koleji yigisha iby’ubumenyi n’ikoranabuhanga, CST (College of Science and Technology).

Hanabaye impinduka muri Koleji y’uburezi, CE (College of Education) ubu ikaba yongereweho imicungire y’ububiko bw’inyandiko CELS (College of Education and Library Sciences), na Koleji yigishaga ibijyanye n’ubuhinzi n’ubumenyi mu buvuzi bw’amatungo, CAVM (College of Agriculture and Veterinary Sciences) yongerwaho ibijyanye n’ibidukikije, ihinduka CAEVM (College of Agriculture, Environment and Veterinary Medicine).

Umuyobozi Wungirije wa Kaminuza y’u Rwanda ushinzwe amasomo n’ubushakashatsi, Prof Nelson Ijumba, yabwiye IGIHE ko izi mpinduka zatewe n’uko Kaminuza y’u Rwanda yifuza kunoza imikorere yayo no kugabanya amafaranga yakoreshwaga bitari ngombwa.

Yagize ati “Impinduka zatangiranye no guhuza kaminuza za leta zikaba imwe, ariko tuza gusanga ko hari amakoleji amwe yari afite amasomo ajya gusa nka CASS na CBE, ugasanga hari n’aho abarimu bakora ingendo bajya kwigisha muri koleji imwe bava mu yindi, bituma tugerageza guhuza koleji zimwe.”

Bigamije kuzamura umusaruro w’ishuri no mu kugabanya ikiguzi ibikorwa byatwaraga kandi bigatuma kaminuza irushaho gutanga umusaruro.

Nyuma y’uko HEC itangaje ko ayo mavugurura atanyuze mu nzira zikwiye, hategerejwe ikizavamo nyuma yo gusuzumwa uko bikwiye. Hagati aho, nubwo bitarasobanuka, itangira ry’umwaka w’amashuri rirenegereje mu kwezi gutaha. Abanyeshuri hirya no hino nabo baba bajujura buri wese atizeye neza aho aziga kuko hari amashami ashobora guhuza, aho bigiraga hagafungwa.



Tanga igitekerezo kuri iyi nkuru



Igitekerezo