Ibyaha  bikomeye abo kwa Rwigara  bashinjwa n’uburyo babikoze

Nyuma y’uko urubanza rwabo rusubitswe inshuro nyinshi ndetse n’isomwa ry’imyanzuro igasubikwa ku wa Gatanu w’icyumweru gishize kubera ubunini bwa Dosiye yabo ,kuri uyu wa Mbere Tariki 23 Ukwakira 2017 nibwo abo kwa Rwigara basomerwa imyanzuro y’urubanza ku ifungwa n’ifungurwa by’agateganyo.

Ibyaha bikomeye Adeline Rwigara, Diane Rwigara ndetse na Anne Rwigara bashinjwa ndetse n’uburyo babikoze.

Ubushinjacyaha buvuga ko hari amajwi (audios) agera kuri 20, ariko hakabamo 8 avugwamo ibintu bishobora guhungabanya umutekano w’abazivugwamo, hakabamo n’abavugwamo bagikorwaho iperereza ngo nabo bakurikiranwe. Yavuze kandi ko bafite abatangabuhamya 70 bamaze gutanga ubuhamya, bityo asaba ko imyirondoro yabo itagaragazwa kuko bashobora guhungabanyirizwa umutekano n’abaregwa cyangwa abo bafatanyije.

Ubushinjacyaha bwerekanye amashusho yafatiwe mu rugo rwo kwa Rwigara umunsi Polisi ijya kubata muri yombi, aho Mukangemanyi Adeline Rwigara yitaga abapolisi interahamwe, abicanyi n’ibindi nk’ibyo, umushinjacyaha asobanura ko bigaragaza ko yashakaga guteza imidugararo n’imvururu muri rubanda.

Adeline Rwigara kandi ashinjwa kuba yaragiye abwira abantu baba hanze y’igihugu, ibintu bigaragaza ko agamije guteza imvururu muri rubanda. Hari aho yagize ati : "Aba bantu nta mbuto yo gutegeka bafite, icyo bazi ni ukwica gusa". Tariki 23 Werurwe 2015, Adeline yifatanyije n’abo mu muryango we bandikira Ikinyamakuru Jeune Afrique, babamenyesha ko Rwigara Assinapol yishwe kandi yishwe na Leta, birengagiza ko bandikiye ikigo cy’ubwishingizi cya Prime Insurance bavuga ko Rwigara yishwe n’impanuka.

Tariki 23 Nzeri 2016, Adeline yoherereje ubutumwa Mushayija Edmond (bahimba Sacyanwa) uba muri Amerika, amwumvisha ububi bw’abatutsi ndetse anabamwangisha amubwira ko abatutsi ari babi. Nyuma kandi ngo yongeye koherereza Tabitha uba muri Canada, amajwi arimo ibihuha bivuga ko hari abatutsi Leta yishe (ubushinjacyaha bwanze kuvuga amazina yabo mu ruhame).

Tariki 17 Ukwakira 2017, Adeline yoherereje amajwi Xaverine bakunda kwita Mama Teta uba muri Amerika, avuga ko Leta iriho mu Rwanda ari Leta y’amabandi, ko yanze gukoresha ikiriyo cy’umwami n’ibindi. Mu kwezi k’Ukwakira kandi ngo yohereje andi majwi yahaye Tabitha, amubwira ko iyi Leta ikwiye kurwanywa, aza kumwoherereza indi amwangisha igice runaka cy’abanyarwanda, avuga ngo abantu bavuye aha n’aha bo mu bwoko ubu ni ubu ni babi, ntimukagendane nabo kuko ari bo bikoresho bya Leta.

Nyuma kandi Adeline yoherereje Tabitha amajwi avuga ko iyi Leta idashoboye gutegeka uretse kumara abantu. Nyuma yamwoherereje andi majwi ashyira ahagaragara umugambi w’abarwanya ubutegetsi mu gihugu, avuga ko hakwiye kwandikwa tracts (inyandiko zikwiza ibihuha) zigamije kurwanya Leta agaragaza n’abantu bo hanze bafatanyije. Nyuma kandi ngo yoherereje Tabitha ubutumwa, avuga ko we ari ikihebe, ko yikundira Radio Itahuka, kandi amwangisha Leta avuga ko icyo izi ari ukwicana gusa. Nyuma yaje kumubwira ko mu Rwanda hari umwijima, ko abantu bihebye ndetse ko igihugu ari icy’abasazi anamubwira ko hari Jenoside iri imbere aha.

Icyaha cyo gukurura amacakubiri, nacyo Ubushinjacyaha buvuga ko yagikoze yoherereza Mushayija Edmond uba muri Amerika, amubwira ko abatutsi ari babi bose... Tariki 13 Ukwakira 2017, Mukangemanyi yabwiye Tabitha mu majwi ko iyi Leta yishe abacitse ku icumu, ko ibarangije, ashyiramo urutonde rw’abantu Leta yishe ishingiye ku kuba baracitse ku icumu rya Jenoside. Yanavuzemo ko ngo abantu bagomba kwitondera abo mu bwoko runaka bavuye ahantu runaka hatatangajwe, kuko ngo ari ibikoresho bya Leta.

Kuri Diane Rwigara, icyaha cyo guteza imvururu muri rubanda, ngo yagikoze ubwo yagiranaga ikiganiro n’abanyamakuru tariki 14 Nyakanga 2017, aho yavuze ko abanyarwanda bahagurukira rimwe ari uko bagiye kwica. Kuri iyi tariki kandi ngo yavugiye mu kiganiro n’abanyamakuru, ko uwitwa Jean d’Amour yamubwiye ko naramuka amushyigikiye mu kwiyamamaza kwe, ngo bazamukubita ifuni. Aha ngo yanahavugiye ko mu Rwanda, abantu bamwe bicwa abandi bakanyerezwa, avuga ko bashimutwa bakicwa abandi bakaburirwa irengero, ibyo byose ngo bikaba ari ibihuha yagendaga akwirakwiza. Ngo yagiye avuga ibintu byinshi birimo ko nta mazi abanyarwanda bafite, ko nta mashanyarazi bafite, aza no kuvuga ngo "Abacitse ku icumu turababaye", ibyo ubushinjacyaha bubona nko gukwiza ibihuha agamije kwangisha abaturage ubutegetsi.

Ku cyaha Diane Rwigara aregwa cyo gukora no gukoresha impapuro mpimbano, ubushinjacyaha buvuga ko yagikoze mu gihe yifuzaga kwiyamamariza umwanya wa Perezida wa Repubulika. Mu byo yari yasabwe na Komisiyo y’amatora birimo imikono y’abantu 600, ngo Diane Rwigara yabonye atabasha kubabona maze agenda asinyira abantu yigana imikono yabo, aza gusinyira n’abari bari mu mahanga ndetse ngo hari n’abo yahimbiye imikono nyamara barapfuye. Ubushinjacyaha kandi buvuga ko hari n’aho Diane Rwigara yagiye abeshya abaturage akababwira ko ari umukozi wa Komisiyo y’amatora, akabwira abaturage ko ashaka kubakosorera kuri lisite y’itora, akabaka indangamuntu n’ikarita y’itora akabyifashisha mu guhimba imikono yabo. Ubushinjacyaha buvuga ko hari n’aho yagiye ashakisha mu buriganya nimero y’indangamuntu n’iy’itora, akoresheje nimero za telefone igendanwa bibarujeho.

Mu bimenyetso ubushinjacyaha buvuga ko bufite, ngo harimo na SIM Cards nyinshi z’abantu yagiye azibaruzaho kugirango abashe kubona imyirondoro yabo, ngo hari n’abatangabuhamya bemeza ko batigeze bamusinyira.

Uwamahoro Rwigara Anne, nawe ku cyaha cyo guteza imidugararo n’imvururu muri rubanda, harimo kuba yari aho yavugaga ko inama akwiye gutanga ari uko abantu bava mu gihugu.

Tariki 10 Ukwakira 2016, Anne Rwigara ngo yanditse kuri Whatsapp ya Group y’umuryango wabo ko hari umuntu wishwe saa yine za mu gitondo ngo kuko hari undi bavuganaga uri mu barwanya ubutegetsi, ndetse ko ngo abo bishe bose ari byo bahita babashinja. Mu bindi bigaragaza ko yakwirakwije imidugararo n’imvururu muri rubanda, Ubushinjacyaha buvuga ko Anne Rwigara asangiye na nyina n’abandi bo mu muryango icyaha cy’uko bandikiye Jeune Afrique bavuga ko Rwigara Assinapol yishwe na Leta kandi bo ubwabo barandikiye ubuyobozi bwa Prime Insurance bagaragaza ko Rwigara yishwe n’impanuka.

Ubushinjacyaha bwerekanye ko aya majwi y’ibiganiro byo kuri whatsapp, yabonetse habanje kubaho isaka n’ifatira ryemewe n’amategeko ryakozwe mu rugo rwo kwa Rwigara, hagakorwa iperereza ryagaragaje ayo majwi yose.

Ubushinjacyaha kandi bugaragaza ko mu bakurikiranywe barimo no gushakishwa, harimo n’abandi benshi baba hanze y’u Rwanda n’abandi bari mu gihugu bagikorwaho iperereza.

Nyuma yo kumvisha amajwi abitabiriye iburanisha, na nyuma yo gusobanura impamvu zikomeye zituma abaregwa bakekwaho ibyaha kandi ko bagomba gukomeza gukurikiranwa bafunze, urukiko rwasabye ko habaho akaruhuko ubundi nyuma y’iminota 15 hakabaho kwisobanura ku ruhande rw’abaregwa.

Ku ruhande rw’abaregwa rwiregura ku byaha bakurikiranyweho. Mukangemanyi Adeline Rwigara, yavuze ko ibijyanye n’ibirego bishingiye ku myitwarire yagaragaje umunsi Polisi ijya kubata muri yombi, yabitewe n’imvamutima (Reactions) z’uburyo abagiye kubafata basanze bameze ndetse agasohorwa yambaye akenda ararana. Ku bijyanye n’ivangura, yavuze we ubwe n’umugabo we ari abacitse ku icumu rya Jenoside bityo atari kuvangura aho basangiye kuba bararokotse. Yavuze kandi ko ibyo yaganiriye n’abantu b’abavandimwe be, atari uguteza imvururu cyangwa imidugararo muri rubanda.

Me Gatera Gashabana nawe umwunganira, yabigarutseho asobanura muri rusange ko ibyo umukiliya we ashinjwa arengana. Yagarukaga kenshi ku kuba ibyaha byose ashinjwa, byakwitwa gutyo bikanitwa ko yabikoze mu maso ya rubanda, mu gihe ari ibintu yaba yarakoze mu ruhame rw’abantu benshi, ko rubanda bavugwa mu itegeko atari umuvandimwe we Tabitha. Aha yavugaga ko ibyo yavuze, byakabaye icyaha iyo aba yarabivugiye muri sitade, iyo aba yarabicishije mu bitangazamakuru cyangwa ahandi mu buryo bwo kubikwirakwiza.

Me Gatera Gashabana yavuze ko ibiganiro by’ubuzima bwite ubushinjacyaha bushingiraho bikwiye guteshwa agaciro. Yagize ati : "Umuntu azaba aganya agaragaza akababaro afite, n’amarira, ashavuye, noneho atakire umuvandimwe we kuko ari we yizeye ushobora kumwumva kuko abandi yatakiye batamwumvise, byitwe icyaha ?"

Me Gatera Gashabana yavuze ko ahubwo gutaka kwa Adeline Rwigara kugaragaza ko yari afite ikibazo, bityo ko umuntu wihebye kubera ibyamubayeho akwiye kwegerwa aho kubiryozwa. Yavuze kandi ko iby’ubutumwa bwohererejwe Jeune Afrique, bikwiye kubazwa icyo kinyamakuru.

Mu kwiregura kwa Anne Uwamahoro Rwigara, yabanje kwisobanura ku bijyanye n’ubutumwa umuryango wa Rwigara ushinjwa ko woherereje ikinyamakuru Jeune Afrique, bavuga ko Se Rwigara Assinapol yishwe na Leta kandi barandikiye Prime Insurance ko yishwe n’impanuka.

Anne Rwigara yisobanuye mu marira n’ikiniga cyinshi, avuga ko ubwo butumwa yabweretswe n’Ubushinjacyaha agasanga nta mukono wabo uriho, bityo ko batazi uwabwanditse ari nawe wabibazwa. Uretse ibyo ariko, yavuze ko uwaba yarabyanditse wese, ashobora kuba yaragendeye ku ibaruwa umuryango wa Rwigara wandikiye Perezida wa Repubulika umusaba ko hakorwa iperereza ryimbitse ku rupfu rwa Rwigara Assinapol.

Yavuze mu rukiko ko kugeza n’ubu atemera ko Se yishwe n’impanuka, ndetse avuga ko we ubwe yamugezeho akiri muzima akanavuga ko yatewe ibyuma mu mutwe, ndetse ngo ibi ninabyo babwiye Polisi ko ikurikirana babonye itabasubiza bandikira Perezida.

Uyu mukobwa wavugaga arira agahozwa na mukuru we ndetse na nyina, yavuze ko ubwo bandikiraga ikigo cy’ubwishingizi cya Prime Insurance, basabwe n’iki kigo kugaragaza raporo kandi ngo iyo bagombaga gutanga ni iya Polisi, kandi ngo Polisi yo yagaragazaga ko Rwigara yishwe n’impanuka. Bityo ko yumva nta cyaha yakoze.

Ku bijyanye n’uko hari aho yavuze ngo iyi Leta ni iya Mafia, yahise asubira inyuma avuga ko hari ibyo umuryango wabo wagiye ukorerwa, byatumye atekereza akabona ko ahazaza habo n’ubucuruzi bwabo hageramiwe, ndetse ngo yibutse ko iyo yagiraga ikibazo mu bucuruzi yitabazaga umubyeyi we, yumva arihebye ari nabyo byatumye avuga iryo jambo. Hari ibindi bijyanye n’uko yavuze ko igihugu gifite amategeko meza ariko adakurikizwa, aha akavuga ko yumva kubivuga nta cyaha yakoze.

Diane Rwigara yahawe ijambo ngo yiregure ku cyaha cyo gucura no gukoresha impapuro mpimbano, maze agihabwa ijambo avuga ko ibyaha byose aregwa ari ibihimbano, ngo icyo azira ni ukuba yarashatse kwiyamamariza kuba Perezida. Yavuze ko yasuzumye agasanga imikono yatanze muri Komisiyo y’amatora itandukanye n’iyo nyuma bagaragaje ko yatanze, ubushinjacyaha bumusabye kwerekana ibyo we yatanze, avuga ko ibintu byose baje gusaka iwabo no ku biro bye bakabitwara kuburyo ntakintu na kimwe afite kugeza ubu.

Diane yavuze ko bamuhimbiye maze nyuma yo gusobanura byinshi ku cyo yita akarengane, asoza asaba Perezida wa Repubulika ko yamufungura hamwe n’abo mu muryango we. Gusa aha umucamanza yahise avuga ko adakwiye kumusabira mu rukiko, ko ubu ibyo basaba byose babisaba urukiko.

Me Buhuru Pierre Celestin, yahawe ijambo maze agaruka ku byo abo yunganira bavuze, nawe agaragaza mu buryo bwimbitse ko abona abakiliya be barengana. Yashimangiye ibyavuzwe na Anne Rwigara ku bijyanye n’ibyo ashinjwa, avuga ko atashinjwa guteza imvururu muri rubanda kandi bishingirwa ku butumwa yandikiye abo mu muryango we, umuryango we ukaba atari wo rubanda. Ku bijyanye n’icyaha cy’inyandiko mpimbano kuri Diane Rwigara, Me Buhuru avuga ko Polisi ari yo yagiye gusaba Komisiyo y’amatora imikono ya Diane Rwigara ngo barebe ko ntabo yasinyiye, yarangiza ikajya gutanga ikirego, agasanga hari ikibyihishe inyuma. Avuga kandi ko kuba imikono iri ku ndangamuntu z’abantu bamusinyiye atari yo igaragara ku mpapuzo yasinyishirijeho, bidasobanura ko basinyiwe na Diane Rwigara.

Ubushinjacyaha bwahawe ijambo ngo bugire icyo buvuga ku kwisobanura kw’abaregwa, maze umushinjacyaha ahera ku kwisobanura kwa Adeline Rwigara, avuga ko n’imbere y’urukiko yakomeje gukwiza impuha nk’uko abishinjwa, kuko avuga ko umugabo we yishwe na Leta kandi atabifitiye ibimenyetso. Ku bijyanye n’icyo kwandikira Jeune Afrique n’ibindi byose by’uko bireguye, Ubushinjacyaha bwakomeje kugaragaza ko ukwiregura kwabo nta shingiro gufite, kandi ko bakomeje gukwiza impuha mu kwiregura kose.

Ku bijyanye n’icyaha cyo gukora no gukoresha impapuro mpimbano gishinjwa Diane Rwigara, ubushinjacyaha bwavuze ko n’ubwo uyu mukobwa abihakana, hari ibimenyetso bifatika bigaragaza ko icyaha yagikoze. Ubushinjacyaha kandi bwasabye urukiko gusesengura amajwi yumvishwe ndetse n’andi akaze kurushaho agomba kumvwa mu muhezo, mu bushishozi bagacukumburamo ibyaha abakurikiranywe baregwa.

Uyu munsi akaba aribwo bategereje umwanzuro w’urukiko ku ifungwa n’infungurwa by’agateganyo gusa abaregwa bakaba bakomeje kuvuga ko nta cyaha bakoze aho basaba ko barekurwa kuko badashobora gutoroka cyangwa gusibanganya ibimenyetso kuko nta cyangombwa na kimwe bafite ,nta Telefone ndetse akaba nta mafaranga babite kuko yafatiriwe na Polisi ndetse na Konti zabo zikaba zifunze.

Imyanzuro ikaba isomwa saa cyenda z’amanywa.

Umubavu.com



Tanga igitekerezo kuri iyi nkuru



Igitekerezo