Hari abashishikarije abandi  gukora Jenoside ubu bicara hafi  ya Kagame

Bamwe mu baregwa icyaha cya Jenoside banakatiwe barasanga ubwiyunge nyabwo butazagerwaho mu gihe hakiri abo bafatanyije bari no muri guverinema y’u Rwanda. Barasaba ko abatanzweho amakuru na bo bakurikiranwa kugira ngo n’abahemukiwe baruhuke. Bavuga ko bamwe mu babashishikarije gukora jenoside bahawe imyanya ikomeye mu butegetsi, bagasanga ubumwe n’ubwiyunge buvugwa ko buri ku kigero gishimishije bwubakiye ku kinyoma.

Learn how to Thrive

Abafungiye muri Gereza Nkuru ya Rubavu iherereye mu Murenge wa Nyakiliba, mu ntara y’Uburengerazuba bw’u Rwanda bavuga ko Abanyarwanda bahereye kera babeshywa, ariko ko byari bikwiye guhinduka abantu bakavugisha ukuri.

Umwe muri bo yagize ati "twashyizwemo ingengabitegekerezo turayonka turayikurana bituma twica benewacu. N’ubu hari Abanyarwanda ubutabera butagezeho, bakingiwe ikibaba kandi ari bo ba nyirabayazana..."

Aba basanga hari hakwiye kubaho ubutabera nyabwo, abatanzweho amakuru bose bagakurikiranwa kugira ngo n’abahemukiwe baruhuke imitima.

Yakomeje agira ati “Hari Abanyarwanda hari hanze ubutabera butakozeho, bakingiwe ikibaba kandi aribo ba nyirabayazana. Iyo bicaranye na Nyakubahwa perezida wa Repubulika baganira nawe bamwumvisha ko ari abantu ariko ni ibirura. Niba twari kumwe nabo muri za mitingi zadushishikarije kwica abatutsi muri 94, niba bo baranatangiye kera muri za ndirimbo zabo z’ abaparimehutu, ndetse bamwe muri bo bakaba baratangiye gutwika kera ari abasore muri za 59 ntabwo ari bakagombye no kuba abajyanama muri iki gihe”

Aba bagororwa basanga hakwiye kubaho ubutabera kuri bose ntihagire abakingirwa ikibaba.

Ati “Niba twaraserukaga ngo tugiye muri za mitingi, twagera mu Ruhengeli tukitakuma imbere ya Habyalimana n’ ayo mahiri ngo ni nta mpongano, bamwicaye iruhande (Habyalimana), ubungubu bakaba bicaye iruhande rwa Nyakubahwa perezida wa repubulika bamubeshya, ibyo ntabwo bikwiriye gukomeza kuba mu gihugu nyakubahwa munyamabanga”

Uyu mugororwa yakomeje avuga ko abo bantu aribo bari bahagarariye imishinga yatangaga imipanga n’ amamodoka yatwaraga abantu mu gihe cya jenoside nk’uko bitangazwa na Radio Ijwi ry’Amerika.

Undi mugororwa yafashe ijambo avuga ko mu bo bafatanyije hari abicaye muri guverinoma batinya kuvuga ukuri no kubasabira imbabazi.

Yagize ati “Twebwe turatekereza ko hariho na bamwe bicaye muri guverinoma batinya kugaragaza ukuri ngo banatuvugire, badusabire n’ imbabazi. Abatanzweho amakuru nabo bazakurikiranywe be gukomeza gukingirwa ikibaba noneho na babandi bahemukiwe baruhuke”

Minisiteri y’Ubutabera ivuga ko hagize abamenyekana bakurikiranwa kuko icyaha cya jenoside kidasaza. Umunyamabanga uhoraho wayo madame Isabelle Karehangabo wari uyoboye itsinda ry’abasuye gereza ya Rubavu, avuga ko mu gihe hamenyekana amakuru ku uwo ari we wese wagize uruhare mu byaha ndengakamere batabura guhanwa.

Ati’’Ikiza cy’ amategeko yacu ni uko icyaha cya jenoside kidasaza. Igihe icyo ari cyo cyose amakuru abonekeye umuntu arakurikiranwa, niba hari abantu waba uzi bari mu buyobozi bw’ igihugu cyangwa afite amakuru y’aho ubuhamya bwaboneka wayatanga ku buyobozi bwa gereza natwe bukayatugezaho tukabikurikirana. Nta narimwe Leta yacu yifuza ko hari umuntu n’ umwe waba warakoze icyaha cy’ indengankamere nka kiriya utakurikiranwe”

Umunyamabanga uhoraho muri Minisiteri y’ ubutabera Isabelle

Ibi bitandukanye n’ ibyo Habyarimana Jean Damascene wahoze ari umunyamabanga nshingwabikorwa wa komisiyo y’ igihugu y’ ubumwe n’ ubwiyunge kuri ubu uhagarariye u Rwanda muri Congo Brazzaville yasubije umunyamakuru wari umubajije impamvu hari abahabwa imyanya muri Leta batabanje kugezwa imbere y’ ubutabera ngo baryozwe ibyaha baba barakoze.

Icyo gihe Habyalimana yasubije ko ari tekinike ya Leta y’ u Rwanda yo kurwana urugamba rw’ abacengezi.

Yagize ati “Kiriya kibazo cy’ abantu bagaruka barakoze nabi, imikorere yacu yo kugira ngo umuntu niba avuga ati ndashaka kugaruka mu rwambyaye, nakoze amakosa ndasaba imbabazi, hariho abamwakira bamumanika, bamushyira mu buroko, kera umuntu yaratahaga bakamushyira mu buroko ntuzamenye aho yagiye ariko ubu turamwakira ahubwo akajya kuri televiziyo agatanga ubuhamya”.

Yunzemo ati “Ari intambara y’ abacengezi muzi uko yanganaga, ari intambara ya FDLR iyo hadakoreshwa iyo tactique ntabwo urwo rugamba tuba twararutsinze. Mu madini babyita kubabarira ariko mu rugamba rwo kwibohoza ni urugamba nk’ urundi.

N’ubwo izi mfungwa n’abagororwa bavuga ko kudahanwa kwa bamwe ari intambamyi ku bumwe n’ubwiyunge byuzuye, Komisiyo y’igihugu y’ubumwe n’ubwiyunge yo ivuga ko igipimo cy’ubumwe n’ubwiyunge kigomba kugera kuri 95 kw’ijana muri uyu mwaka wa 2017.

Abafungiye muri gereza nkuru ya Rubavu bose hamwe ni 6,280. Abaregwa icyaha cya jenoside bakatiwe ni 2,456. Abaregwa icyo cyaha badakatiye ni batatu.


Travel for Free!


Tanga igitekerezo kuri iyi nkuru



Igitekerezo