Hagiye gukorwa ibyogajuru bihuza imigi imwe n’imwe ku isi mu masegonda make

Elon Musk, umwe mu batunze agatubutse yahisemo gushora imitungo ye mu bijyanye n’ibyogajuru bya Rockets yijeje isi ko mu gihe gito urugendo rwa London - New York rutazongera kurenza iminota 30 gusa.

Mu bisanzwe uru rugendo rugendwa n’indege mu masaha nk’umunani yose. Mu nama y’ihuriro mpuzamahanga ku buhanga bw’ibyogajuru -IAC (International Astronautical Congress) yabereye Adelaide muri Australia, bwana Musk yijeje abari bitabiriye iyo ko azatangira ingendo ku mubumbe wa Mars mu 2024.

Ikigo cye SpaceX kizatangira kubaka ibyogajuru bizafata izo ngendo mu mwaka utaha wa 2018. Avuga ko ashaka ko SpaceX yibanda ku cyogajuru kimwe yise BFR, kizasimbura ibisanzwe bihari kikanahuza imibumbe itandukanye.
Bwana Musk yari yijeje inama ya IAC y’umwaka washize ko ari kwitegura gutanga ubushobozi bwo gufata ingendo zo ku mubumbe wa Mars none ubu akaba yarazanye indi mihigo mishya ndetse anerekana ko arimo kunononsora uyu mugambi we.
Icyo cyogajuru yise BFR kizaba gifite uburebure bwa metero 106 na metero 9 z’ubugari akaba yaragabanijeho gato uko yateganya ko cyubakwa ubwa mbere.

Uyu munyamerika afite inkomoko ku mugabane wa Afrika muu gihugu cya Afurika y’Epfo avuga ko icyo asigaje ari amafaranga kizamutwara gusa kugirango amenye uko ahuriza hamwe uburyo bwe mu gushaka igisubizo kirambye mu koroshya ingendo haba ku mubumbe w’isi cyangwa hanze yawo.
Icyogajuru BFR, kizatanga uburyo busumba ubwatangwaga n’ibigo by’ibyogajuru byari bisanzwe, ni ukuvuga ibikorwa na Falcon 9 na Dragon by’ikigo SpaceX, nabyo byari bisanzwe byifashishwa mu ngendo zo ku kwezi, ku mubumbe wa Mars ndetse no ku isi.
Bwana Musk avuga ko ibi bizatuma ingendo abantu bafata nka ndende zishobora gukorwa mu gihe cy’iminota mikeya cyane.
Uretse kuba umuyobozi nshingwabikorwa wa SpaceX, Bwana Musk ni nawe washinze kampanyi y’imodokari zitwarwa n’amashanyarazi ya Tesla akaba n’umukuru w’ikigo cya SolarCity giteza imbere ikoreshwa ry’amasoko.
Nubwo rimwe na rimwe ibyo yiyemeje gukora bitagerwaho ijana ku ijana, amaze kugera ku bitari bike birimo kohereza ibyogajuru mu kirere bikagaruka ku isi amahoro inshuro zisaga 16 zose kandi zikurikiranya. Bimwe na bimwe ndetse bimaze kugira ingendo zabyo za kabiri.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo