Hafashwe ibikoresho byategurirwaga gutoba amatora ya Kamarampaka mu Burundi

Minisiteri y’umutekano mu gihugu cy’u Burundi iratangaza ko yafashe imodoka zo mu bwoko bwa Camionnette (Double Cabine) 10 na Moto 27 mu mujyi wa Bujumbura bikekwa ko ziri gutegurwa kuzifashishwa mu guhungabanya umutekano mu matora ya Kamarampaka ateganyijwe kuba ku wa 17 Gicurasi 2018 mu Burundi yo kwemeza niba Itegeko Nshinga ry’igihugu rihindurwa cyangwa ridahindurwa, abareberera Politiki y’iki gihugu bo bakavuga ko ibi byose bigamije guharurira inzira Perezida Nkurunziza yo kugundira ubutegetsi.

Iyi Minisiteri y’umutekano mu Burundi itangaza kandi ko yatahuye ko izi modoka na Moto ari iby’umunyapolitike Hussen Radjabu, wahoze ayoboye ishyaka riri ku butegetsi ariko ubu akaba abarizwa mu buhungiro.

PNG - 692.4 kb
Bivugwa ko izi modoka Hussein Radjabu yaziguze akiri umukuru w’ishyaka CNDD FDD nyuma yakwirukanwa agahita azinyereza


Ngo amakuru inzego z’umutekano zifite ni uko izo modoka zarimo zitegurwa kugira ngo zizakoreshwe mu guhungabanya umutekano muri kino gihe hitegurwa amatora ya Kamarampaka ku ihindurwa ry’Itegeko Nshinga.

Zimwe muri izo Moto ziriho ibimenyetso by’ishyaka UPD, ngo ariko iri shyaka rigahakana ko ari izaryo.

PNG - 788.4 kb
Zimwe muri izi Moto ziriho ibimenyetso by’ishyaka UPD ariko ntiryemera ko ari izaryo

Guhungabanya umutekano

Nkuko Pierre Nkurikiye, umuvugizi wa Minisiteri y’umutekano abitangaza, izo modoka n’ibyo bikoresho ngo byari bimaze imyaka irindwi biburiwe irengero bikavugwa ko byari byarahishwe k’uwitwa Bayousoufu muri zone ya Rohero.

Ngo Hussen Radjabu yari yabiguze akiyobora ishyaka riri ku butegetsi, CNDD-FDD ariko akimara kwamburwa inshingano zo kuyobora iri shyaka ahita azinyereza.

Hussein Radjabu yaje gufatwa arafungwa ashinjwa gushaka guhirika ubutegetsi bushya bw’ishyaka yari ayoboye nyuma yo kutumvikana kwadutse hagati ye n’abandi bayobozi b’ishyaka.

PNG - 817.4 kb
Amakuru inzego z’umutekano zifite ngo ni uko izo modoka zarimo zitegurirwa kuzakoreshwa mu guhungabanya umutekano mu matora ya Kamarampaka ateganyijwe mu cyumweru gitaha


Uyu mugabo kandi yaje gutoroka gereza muri 2015 nyuma y’imyaka umunani afunzwe, kuri ubu akaba akunze kumvikana gake anenga ibikorwa by’ubutegetsi, avuga ko bwamurenganyije.

Ari mu bantu batangije kandi bakorera cyane ishyaka CNDD-FDD kuva rikiri mu ishyamba kugeza rifashe ubutegetsi muri 2005 yewe na nyuma yaho.
BBC yanditse iyi nkuru iracyagerageza kumenya icyo Hussein Radjabu avuga kuri ibi byose ashinjwa.

Minisiteri y’Umutekano mu Burundi itangaje ibi mu gihe ku wa Kabiri tariki ya 1 Gicurasi 2018, Leta Zunze Ubumwe za Amerika zisohoye itangazo rivuga ko zifite impungenge kuri aya matora yimirijwe imbere ngo kuko mu gihe Itegeko Nshinga ryaba ryahinduwe hakongerwa igihe cya manda z’umukuru w’igihugu amasezerano yashyiriweho umukono i Arusha yaba ateshejwe agaciro by’umwihariko bigamije kwemerera Perezida Nkurunziza kugundira ku butegetsi.

Daniel MUKESHIMANA@Umubavu.com


Travel for Free!


Tanga igitekerezo kuri iyi nkuru



Igitekerezo
pole Kuya 12-05-2018

Uburundi nubwo gusengerwa