Guverineri Gatabazi yasabye abakozi b’akarere ka Musanze gukorera hamwe mu kubungabunga umutekano

Umuyobozi w’Intara y’Amajyaruguru Gatabazi Jean Marie Vianney, mu mpera z’icyumweru gishize yasabye abayobozi b’inzego zitandukanye zikorera mu karere ka Musanze gukorera hamwe mu kubungabunga umutekano.

Ibi yabivugiye mu nama yari yahuje abayobozi b’inzego z’ibanze bose bo mu karere ka Musanze, ab’iz’umutekano, iyi nama yari yanatumiwemo abagize inama y’umutekano itaguye y’Intara y’Amajyaruguru, ikaba yarabereye mu cyumba cy’inama cy’akarere ka Musanze.

Muri iyi nama, abitabiriye barebeye hamwe uko umutekano uhagaze mu Karere ka Musanze, aho byagaragaye ko nta kidasanzwe cyagaragaye muri aka Karere.

Guverineri Gatabazi nyamara, yasabye abitabiriye inama guhora bari maso barebera abaturage ku buryo ntagikwiye guhungabanya umutekano wabo.

Yibukije aba bayobozi inshingano zabo, abasaba gukomeza gushyira mu bikorwa ibijyanye n’imirimo batorewe ndetse n’uruhare rwabo mu kwicungira umutekano n’uwabo bayobora.

Aha yaravuze ati :” Twese turasabwa gukorera hamwe ngo hatagira igihungabanya uyu mutekano dufite, tugakumira ingeso zose zishobora guhungabanya umutekano zirimo ubusinzi, gukoresha ibiyobyabwenge, ubusambanyi, gushakana binyuranye n’amategeko, n’ibindi.

Yakomeje asaba aba bayobozi kurwanya ruswa n’akarengane bigaragara mu nzego z’ibanze no gukemura neza ibibazo by’abaturage.

Kuri iyi ngingo yaravuze ati :” Dukwiye kumenya ko kizira gutanga ruswa no kudatinya umugayo, kirazira kandi kurangarana no kurenganya abo tuyobora.”

Guverineri Gatabazi yasabye abayobozi kugira imikorere n’imikoranire myiza, hakubakwa ubufatanye mu kazi, gukorera ku mihigo no kugira impinduka mu kazi ka buri munsi, bagakangurira abaturage ko isuku yajya muri gahunda zabo za buri munsi.

Yasoje yibutsa abayobozi gucunga neza umutungo wa rubanda kuko uba wavuye mu misoro yabo.

Umuyobozi wa Polisi mu Ntara y’Amajyaruguru Assistant Commissioner of Police (ACP) Rogers Rutikanga wari witabiriye iyi nama, yababwiye ko umutekano ari ikintu kinini kuko utareba ingabo na Polisi gusa, ko ahubwo buri wese afite uruhare mu kuwubungabunga aho atuye, mu bukungu, muri Politike no mu mibanire y’abantu n’abandi.

Yaravuze ati :”Ntawe utazi ko umutekano ariwo shingiro rya byose, biradusaba rero ubufatanye bwacu n’abaturage mu kuwubungabunga hagamijwe iterambere ry’igihugu.”

ACP Rutikanga yasabye aba bayobozi gukangurira abaturage gukora neza amarondo bicungira umutekano no gutanga amakuru ku gihe kandi mu buryo bwihuse y’icyahungabanya umutekano w’aho batuye.



Tanga igitekerezo kuri iyi nkuru



Igitekerezo