Gukoresha nabi Facebook byamwirukanishije muri Kaminuza

Umunyeshuri witwa David Morara wo mu gihugu cya Kenya yirukanywe nyuma yo gutahurwaho gukoresha nabi urukuta rwe rwa Facebook ashyiraho amafoto mabi ndetse anavugaho ibitekerezo bitubaka yirengagije amategeko agenga imikoreshereze y’imbuga nkoranyambaga muri Kaminuza ya Kenyatta University.

David Morara yirukanywe muri Kaminuza ya Kenyatta University nyuma yuko yakiriye ibaruwa y’umuyobozi w’iyi Kaminuza ndetse yanasizweho umukono n’uhagarariye abanyeshuri nkuko ikinyamakuru TUKO cyabyanditse.

Uyu munyeshuri ngo n’ubundi yari yarahawe gasopo ku mikoreshereze ye mibi y’imbuga nkoranyambaga ariko akomeza kuvunira ibiti mu matwi ashyira kuri izi mbuga ibyo yishakiye ndetse anandikaho ibitekerezo bitubaka abanyeshuri bagenzi be.

Nyuma y’o kwirukanwa bimwe mu binyamakuru byashatse kumenya niba koko yirukanywe azira imbuga nkoranyambaga ngo bitahurwa ko uyu munyeshuri yari asanzwe ari umuyobozi w’ihuriro ry’abanyeshuri (Kenyatta University Students Association, KUSA) batavuga rumwe n’ubutegetsi buriho mu gihugu cya Kenya bityo bigakekwa ko nabyo byaba bifite aho bihuriye dore ko umukandida wabo Raila Odinga yikuye mu matora ntabashe guhangana na Uhuru Kenyatta wegukanye intsinzi.

Iperereza rirakomeje ngo hamenyekane niba koko David Morara yirukanywe azira gukoresha nabi imbuga nkoranyambaga nkuko byatangajwe cyangwa niba hari ikindi kibyihishe inyuma.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo