Goma:Humvikanye amasasu,abaturage baheze mu mazu,abasirikare n’abapolisi ni benshi

Abasirikare benshi n’abapolisi ba Repubulika Iharanira Demokarasi ya Congo bari mu mujyi wa Goma ufatwa nk’umurwa mukuru w’Intara ya Kivu y’Amajyaruguru.

Amakuru avuga ko aba basirikare n’abapolisi baje mu gitondo cyo kuri uyu wa Gatatu tariki 15 Ugushyingo 2017 saa kumi n’imwe ndetse ngo hakaba humvikanye amasasu mu burengerazuba bw’umujyi wa Goma ubwo urubyiruko rwo mu duce twa Majengo, Keshero na Himbi rwageregezaga gufunga imihanda.

Ngo kubera ibi byabaye abasirikare n’abapolisi bafunze imihanda ikunze kurangwa n’ibikorwa byinshi nka Katindo,-Ndosho na Mabanga-Majengo.

Amakuru akomeza avuga ko inzego z’umutekano zarashe ibyuka biryana mu maso ku bigaragambyaga ndetse ngo hakaba hari n’abantu batanu bamaze gutabwa muri yombi gusa ngo uyu mubare ushobora kwiyongera.

Ingabo z’Umuryango w’Abibumbye ziri mu butumwa bw’amahoro muri iki guhugu(MONUSCO) ngo zikaba ziri gucunga umutekano mu duce dutandukanye muri uyu mujyi mu rwego rwo kurinda abaturage nk’uko bitangazwa na Radio Okapi.Gusa ngo ibikorwa byose bisa n’ibyahagaze kuko nta mubyeyi wigeze wohereza umwana ku ishuri,amasoko arafunze ndetse nta muntu uri gusohoka mu nzu.

Ihuriro ry’Abanyagihugu baharandiura impunduka muri Congo (LUCHA) hamwe n’iryitwa Filimbi bashyigikiwe n’abatavuga rumwe n’ubutegetsi bakaba barateguye imyigaragambyo yamagana ibyavuzwe na Komisiyo y’amatora yemeje ko amatora ya Perezida azaba Tariki 23 Ukuboza 2018.

Sibyo gusa ngo iyi myigaragambyo ikaba yari mu rwego rwo gusaba Perezida Joseph Kabila kuva ku butegetsi bitarenze tariki 31 Ukuboza uyu mwaka.

Mu minshi ishize nibwo mu mujyi wa Goma habaye imyigaragambyo isaba Kabila kuva ku butegetsi aho yaguyemo abaturage ndetse no ku ruhande rw’abashinzwe umutekano bamwe bakaba barahasize ubuzima.

Gabriel Habineza/Umubavu.com.



Tanga igitekerezo kuri iyi nkuru



Igitekerezo