Gicumbi:Umuturage yishe Umukuru w’Umudugudu

Katurebe Gaspard wayoboraga Umududugu mu Kagari ka Bukura mu Murenge wa Kaniga mu Karere ka Gicumbi, yakubiswe igiti mu mutwe n’uwitwa Hagenimana basangiraga inzoga mu kabari maze ahita yitaba Imana.

Ibi bikaba yabaye mu ijoro ryo kuri uyu wa Mbere tariki ya 28 Kanama 2017, mu masaha ya saa tatu ubwo aba bagabo bombi bari mu kabari basangira bisanzwe dore ko aka kabari kari ak’uyu muyobozi w’umudugudu, Katurebe Gaspard.

Aya makuru akaba yemejwe n’Umuvugizi wa Polisi y’Igihugu mu Ntara y’Amajyaruguru ,IP Innocent Gasasira wavuze ko urupfu rw’uyu mukuru w’Umudugudu rwabaye ahagana saa satu z’ijoro ryo kuri uyu wa 28 Kanama 2017.

IP Innocent Gasasira yashimangiye ko Katurebe Gaspard w’imyaka 46 y’amavuko ariwe wishwe, mu gihe ukekwaho kumwica yitwa Hagenimana Thacien w’imyaka 21 y’amavuko wanahise atabwa muri yombi na Polisi ubu akaba afungiye kuri Sitasiyo ya Mulindi.

Yagize ati "Nibyo koko umuyobozi w’Umudugudu witwa Katurebe Gaspard mu kagari ka Rukura murenge wa Kaniga muri Gicumbi wari ufite akabari k’ikigage yari muri aka kabari ke, hanyuma abanyerondo bazana abana 2 bari bibye ubuki, noneho kwa kundi umubyeyi acyaha abana atangiye kubakubita, umugabo wanyweraga muri ako kabari witwa Hagenimana atangira kubwira nabi uyu mukuru w’umudugudu maze baratongana, hanyuma uyu mugabo ajya hanze azana umwase awukubita uyu mukuru w’umudugudu mu mutwe ahita apfa."

Ngo uyu mukuru w’umudugudu akimara gushiramo umwuka bahise bamujyana ku bitaro bya Byumba kugirango umurambo usuzumwe maze abaganga bazemeze ibijyanye n’urupfu rwe maze bizafashe ubushinjacyaha.

IP Innocent Gasasira yasabye abaturage kwirinda ibiyobyabwenge kuko aribyo bituma bivamo urupfu rwa hato na hato.Ngo gukoresha ibi biyobyabwenge bituma kenshi umuntu arushwa imbara nabyo ntabashe gutandukana ikibi n’icyiza.



Tanga igitekerezo kuri iyi nkuru



Igitekerezo