Gashora:Girinka ihabwa uwatanze ruswa

Bamwe mu batuye mu murenge wa Gashora barinubira amanyanga bavuga ko arangwa muri gahunda ya Gira inka ngo dore ko hari abamburwa inka bitewe no kudatanga ruswa.

Aba baturage batuye mu tugari dutandukanye tugize uyu murenge wa Gashora mu karere ka Bugesera, bavuga ko ari kenshi bashyirwa ku rutonde rw’abagomba guhabwa inka muri gahunda ya gira inka munyarwanda, mu gihe cyo kuzihabwa bagahamagazwa nk’abandi ariko nyamara ngo bikarangira batazihawe.

Usibye aba bavuga ko bashyirwa ku rutonde rw’abagomba guhabwa inka ariko ntibazihabwe, uyu mugabo we avuga ko yayihawe ariko kubera kudatanga ruswa ngo aza kuyakwa.

Aba baturage bahuriza ku gusaba ubuyobozi gukurikiza amabwiriza ya gahunda ya gira inka kandi abagize uruhare mu kwaka ruswa aba baturage bagakurikiranwa.

Ku ruhande rw’ubuyobozi bw’umurenge wa Gashora, madame UWAMUGIRA Maritha umunyamabanga nshingwabikorwa wawo, avuga ko kwambura inka umuturage yari ayimaranye igihe bishoboka naho ngo gushyirwa ku rutonde ugatinda guhabwa inka nabyo ngo bigendera ku buryo iyi gahunda iteye.

Umunyamabanga nshingwabikorwa w’umurenge wa Gashora yabwiye Radio/Tv one ko ibi bibazo bigaragazwa n’aba baturage bigiye gukurikiranwa byumwihariko hagamijwe kunoza iyi gahunda.

Si aha muri Gashora havuzwe inenge nk’izi muri iyi gahunda ya gira inka munyarwanda kuko ibi byakunze kumvikana kandi bikinumvikana hirya no hino mu gihugu ari nako inzego bireba zigenda zirushaho kunoza iyi gahunda igamije kuzamura imibereho y’abatishoboye.



Tanga igitekerezo kuri iyi nkuru



Igitekerezo