FDLR  yaciye imitwe abantu 5 barimo umwana w’imyaka 12

Abantu batanu barimo umwana w’umukobwa w’imyaka 12 kuri uyu wa Kane, itariki 23 Ugushyingo baciwe imitwe n’inyeshyamba bivugwa ko ari izo mu mutwe wa FDLR-Rudi ugizwe n’inyeshyamba z’Abanyarwanda, ahitwa Kibirizi mu birometero nka 200 mu majyaruguru ya Goma, muri Sheferi ya Bwito, ho muri Teritwari ya Rutshuru.

Nk’uko bitangazwa n’uwungirije by’agateganyo guverineri muri Kibirizi, ngo ibyakozwe n’icyaha ndengakamere, kuko imibiri y’abishwe yacagaguwemo ibice ndetse bimwe bikajyanwa.

Radio Okapi dukesha iyi nkuru ikaba ivuga ko ari imiryango 2 yibasiwe, umwe ukaba wari ugizwe n’umupapa, umumama n’umwana wabo w’umukobwa w’imyaka 12. Aba ngo bakaba bari barimo kugaruka muri Kibirizi bavuye gutashya inkwi.

Naho mu muryango wa kabiri, ngo ni umugore n’umugabo bari bagiye guhinga, maze mu nzira bahura n’inyeshyamba za FDLR-Rudi nk’uko byemejwe n’abantu batatu babashije kurokoka.

Umuryango CEPADHO, uharanira uburenganzira bwa muntu ukorera I Beni, wahise utera akamo abayobozi bo muri Bwito gukora ibishoboka ngo abaturage barindwe kugwa mu mitego y’inyeshyamba zirimo gukora ubwicanyi zigamije guteranya ibiturage bibiri bituranye ngo birwane.

Bikaba bivugwa ko hashize imyaka 2 amakimbirane akongezwa n’imitwe yitwaje ibirwanisho ashingiye ku moko yibasira abaturage, aho ngo amaze kugwamo benshi ndetse abandi bagata ibyabo.



Tanga igitekerezo kuri iyi nkuru



Igitekerezo