Burera : Umubyeyi wari uvuye gushyingura yasimbutse umugezi wuzuye ahetse uruhinja rugwamo ruhita ruhasiga ubuzima

Umubyeyi witwa Izabayo Olive w’imyaka 21, utuye mu murenge wa Gahunga, mu karere ka Burera yaguye mu mugezi wa Nyabungo, nyuma y’imvura nyinshi yaguye ku munsi w’ejo hashize, ikaba nyinshi cyane mu birunga, uruhinja yari ahetse rugwamo runahasiga ubuzima.

Ibi byago byagwiriye uyu mubyeyi witwa Izabayo Olive ku munsi w’ejo ubwo n’ubundi yari avuye gushyingura, umwana we agwa mu mugezi wa Nyabyungo uherereye mu mudugudu wa Kigote mu kagari ka Gisizi, mu murenge wa Gahunga nyuma yo kugerageza gusimbuka kubw’amahirwe makeya umwana we agwamo aza gukurwamo yitabye Imana.

Akigera ku mugezi utemba wa Nyabyungo (ugira amazi menshi iyo imvura yaguye mu birunga) hari saa kumi n’imwe z’umugoroba, Izabayo yasanze wuzuye, yigira inama yo gusimbuka niko kugwamo, aratabaza ariko abamutabaye ntabwo babashije gutabara uwo yari ahetse kuko bamukuyemo byarangiye.

Umunyamabanga nshingwabikorwa w’umurenge wa Gahunga, Bizimana Ildephonse yabwiye itangazamakuru ko Izabayo yaguye mu mugezi wa Nyabyungo, ariko umwana yari ahetse wari ufite amezi 9 akaza kubonwa nyuma y’iminota 50 yashizemo umwuka.

Yagioze ati “Uwo mugore yari avuye gushyingura, ageze ku mugezi wa Nyabyungo asanga wuzuye, we yahisemo kuwusimbuka ariko ntibyamuhira agwamo, umwana yari ahetse we yahise atemba, Izabayo rero yatabaje abantu babasha kumukuramo, gusa umwana we yari yatembye”.

Bizimana akomeza avuga ko bakomeje gushakisha uwo mwana hafi aho, gusa ngo mu minota 50, saa kumi n’ebyili uwo mwana yabonywe yashizemo umwuka, mu murenge wa Cyuve mu karere ka Musanze, umurambo w’uwo mwana uhita ujyanwa mu buruhukiro bw’ibitaro bya Ruhengeri. Imana imwakire mu bayo !

Daniel MUKESHIMANA@Umubavu.com



Tanga igitekerezo kuri iyi nkuru



Igitekerezo