Bombori bombori mu Itorero ry’Abadivantiste mu Rwanda,riravugwamo ivangura

Pasiteri Rusine Josue ,wahoze ari umupasiteri muri iri torero ndetse akaba amaze kumenyekana bitewe no gushyingira bamwe mu basitari bo mu Rwanda nka Knowless ndetse na Gaby,arashinja itorero ry’abadivantiste imikorere mibi ishingiye ku ivangura n’uburiganya.

Ibi byatangiye gututumba ubwo uyu mupasiteri Rusine Josue yashyingiraga Umuhanzikazi Knowless n’umukunzi we Ishimwe Clement ariko noneho biza kuba agatereranzamba ubwo uyu mupasiteri yashyingiraga Umuhanzi Umutare Gaby n’umukunzi we Nzere Joyce,ari naho iri torero ryatangiye kutumvikana n’uyu mupasiteri rivuga ko mu itorero ry’abadivantiste bitemewe gushyingirira abantu mu busitani.

Uyu mupasiteri nawe asubiza ubuyobozi bw’iri torero yavuze ko ubuyobozi bw’iri torero bufite imikorere idahwitse,yavuze ko bitangaje kuba yaramaganiwe kure kandi umukobwa wa Pasiteri Byiringiro Hesron ; Umuyobozi w’Itorero ry’abadivantisiti mu Rwanda yarashyingiriwe mu busitani bw’akabari.

Mu kiganiro yagiranye n’ikinyamakuru Ukwezi.com, Pasiteri Rusine Josue yavuze ko kwamaganirwa kure kwe ntacyo bimubwiye kuko atari we washyingiye Umutare Gaby na Joyce, avuga ko bashyingiwe n’Imana yari muri bo umunsi bemeranywa kubana.

Uyu mupasiteri kandi yatangaje ko impamvu zatumye asezera mu itorero ry’abadivantisiti mu Rwanda kandi yarahoze ari umwe mu bayobozi baryo, yavuze ko yasezeye ahanini bitewe n’ivangura rigaragara mu buyobozi bw’iri torero.

Yagize ati : ”Kimwe mu bintu by’ingenzi byatumye nsezera mu itorero ry’abadivantisiti, ni uko iri torero mu buyobozi bwaryo harangwamo cyane ivangura”.

Pasiteri Rusine Josue kandi yagaragaje ko n’ubwo itorero ry’Abadivantisiti rigaragaza ko yakosheje agashyingira abageni basezeraniye mu busitani bwa hoteli, n’umuyobozi wabo yakoze nk’ibyo.

Yagize ati : “Ubukwe bw’umukobwa wa Pasitoro Byiringiro ; Umuyobozi w’Itorero ry’abadivantisiti mu Rwanda bwashyingiriwe hehe ? Ntabwo bwashyingiriwe mu rusengero, ahubwo bwashyingiriwe muri Jardin y’akabari ka Bambino i Kabuga., hari ubundi bukwe bw’abadivantisiti natashye bwabereye i Nyarutarama mu busitani bw’urusengero rw’abaporo”.

Uyu mushumba uvuga ko yigenga, ashimangira ko nta na rimwe ashobora kubaza abagiye gushyingirwa ngo baratwite, ngo kuki arijye muje kureba, gusa avuga ko icyo abaza umusore n’inkumi baje bamugana ari icyemezo cyerekana ko bashyingiwe binyuze mu mategeko ya Leta.

Akomeza avuga ko kuba ubuyobozi bw’Itorero ry’abadivantisiti mu Rwanda bwaramaganiye kure uyu mushumba, avuga ko nta kibazo bimuteye kuko we atakibarizwa mu mubare w’abapasitori b’iri torero ndetse ahamya ko adashobora na rimwe kwiyitirira iri torero.

Ati :”Ku bwanjye icyo mvuga ku byamvuzweho, ni uko ntigeze na rimwe, sinzigera niyitirira itorero ry’abadivantisiti ngo ndi umupasitoro waryo kuko iyo nkenera kugumya kuba mu murongo barimo nari kugumamo, ni njye wabasezereye. Bafite uburenganzira bwo kwandika ibyo bashaka”.

Abajijwe niba amaherezo atazashinga idini, Pasiteri Rusine Josue mu mvugo ye n’ubwo yahakanye yaciye amarenga y’uko amaherezo ariho bigana. Yagize ati : ”Ntabwo nzi uko ejo bizaba bimeze, ariko nzi uko uyu munsi bimeze, igitekerezo mfite ni uko, ntabwo Yesu yigeze ararikira abantu gushinga amadini, ahubwo Yesu n’inzira ye idusaba kubwira abantu inkuru nziza ya Kirisitu”.

Pasiteri Rusine Josue avuga ko iteka ababazwa n’uburyo abasore n’inkumi bafite umugambi mwiza wo kubana kenshi usanga amadini abacamo ibice aho usanga niba badahuje amadini ubukwe bwabo bupfa, abanyamadini bari kubabwira ko batizera kimwe aho avuga ko amadini amaze kuba urusika.
Yasoje avuga ko abantu aho kwizera Kirisito bari kumusimbuza idini.

Yagize ati :”amahirwe ni uko mu Rwanda dufite Leta iba hafi irinda umutekano naho ubundi abantu bamarana kubera amadini atandukanye barimo”.

Icyakoze ku rundi ruhande, Onesphore Yadusoneye uyobora icyiciro cy’Itumanaho mu Itorero ry’Abadivantisiti b’Umunsi wa karindwi mu Rwanda, ku bijyanye no kuba Pasiteri Byiringiro nawe umukobwa we yarashyingiriwe mu busitani bw’akabari, avuga ko atari byo kuko nta mukobwa w’uyu muyobozi mukuru w’Itorero washyingiriwe mu Rwanda.

Pasiteri RUSINE Yoshua ni umunyarwanda wavukiye mu murenge wa Musha mu karere ka Gisagara mu Majyepfo y’u Rwanda, arubatse akaba afite umugore n’abana batatu,yakuriye mu muryango w’ababyeyi b’abakristo (itorero ry’abadventisti),yabaye umuyobozi w’Itorero ry’Abadiventiste b’umunsi wa Karindwi mu Ntara y’ Uburengerazuba ‘West Field’ (Diocese) nyuma aza guhagarikwa kuri iyi mirimo asimbuzwa Pasiteri Ngamije Dan,uretse ibi kandi yanabaye umukozi muri Kaminuza yigenga y’Abadiventiste i Gitwe mu Karere ka Ruhango,tariki ya 3 Mutarama 2011 nibwo yasezeye mu Itorero ry’Abadiventiste,ku mpamvu z’uko ngo yabonaga umugambi itorero ryatangiranye atari wo ryari rigifite.

Kugeza ubu Pasiteri Rusine Joshua nta torero agira abarizwamo gusa yemera ko ari umukirisitu kandi wuzuza neza inshingano Imana imusaba.

Anaclet NTIRUSHWA//Umubavu.com



Tanga igitekerezo kuri iyi nkuru



Igitekerezo