Bidasubirwaho ibitaro bya CHUK bigiye kwimurwa

Imyiteguro yo kwimura ibitaro bya CHUK bikavanwa mu Mujyi wa Kigali bikimurirwa I Masaka irarimbanyije, bikavugwa ko ibi bitaro bitagakwiye kuba biri hagati mu Karere k’ubucuruzi.

Dr Theobald Hategekimana, Umuyobozi Mukuru w’ibitaro bya CHUK, yemeje aya makuru mu kiganiro yahaye The New Times, ariko avuga ko byose biri gukurikiranwa na Minisiteri y’Ubuzima.

Minisitiri w’Ubuzima, Dr. Diane Gashumba, nawe akaba yabwiye iki kinyamakuru ko igishushanyo mbonera cy’ahagiye kwimurirwa ibitaro bya CHUK kigeze ku musozo.

Dr. Gashumba yongeyeho ko imirimo yo kubaka biteganyijwe ko izatangira muri uyu mwaka ariko igihe izarangirira kikaba kizasobanuka neza ubwo igishushanyo kizaba kirangiye.

Ni imirimo izatwara hafi Miliyari 6 z’amanyarwanda, aho kubyubaka biri mu bufatanye bwa Guverinoma y’u Rwanda n’iy’u Bubiligi.

Nk’uko biteganywa n’igishushanyo mbonera cy’Umujyi wa Kigali, aho CHUK iherereye kuri ubu, iruhande rwa Serena Hotel, hateganyijwe kubakwa amacumbi yo kubamo (Apartments).
Kugeza ubu ibi bitaro bizwiho kugira abarwayi benshi baturutse imihanda yose, aho hari n’aho baburaga n’ibitanda bajyaho.

Iyubakwa by’ibi bitaro i Masaka, bije nyuma yaho muri iyi minsi hatangijwe kubaka ibitaro bishya byo ku rwego rw’Akarere biri kubakwa mu Murenge wa Nyamirambo muri Nyarugenge, bikaba bizunganira ibya Muhima biri kuri urwo rwego.

Ibitaro bya CHUK byubatswe mu 1918, bitangira gukora mu 1928. Byabanje gukora nk’Ikigo Nderabuzima mbere yo kuzamurwa mu bushobozi biba ibitaro bikuru mu 1965.

Kuva muri Mata 1994 kugeza mu 1996, CHUK yakoraga nk’ikigo nderabuzima, nk’ibitaro by’Akarere ndetse nk’ibitaro by’icyitegererezo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo