Bamwe mu barimu ba Kaminuza y’u Rwanda bagiye kujya bahugurwa ku rurimi rw’Icyongereza

Ireme ry’uburezi mu Rwanda ni ikintu kidasiba gukemangwa uko bukeye nuko bwije aho bivugwa ko bamwe mu banyeshuri barangiza amasomo muri za kaminuza ariko ugasanga nta bumenyi buhagije bafite yewe n’ururimi rw’icyongereza ugasanga ni ikibazo gikomeye haba mu mivugire ndetse no mu myandikire yarwo, bikavugwa ko na bamwe mu barimu badasobanukiwe uru rurimi kandi ari rwo bigishamo.

Bamwe mu banyeshuri biga muri za kaminuza ku kibazo cyo kumenya ururimi rw’icyongeraza bavuga ko bigoye kurumenya mu gihe bigishwa hakoreshejwe inyandiko cyangwa uburyo bwo kumurika inyandiko ku bikuta (projection) ariko urwigishamo nawe bikamugora cyangwa akigisha mu rurimi rw’ikinyarwanda nabo bakajya kwirwariza.

Bakomeza bavuga ko kumenya ururimi rw’icyongereza mu gihe utarwize neza mu mashuri yisumbuye bigoranye kuba wagira icyo wisumburaho ugeze muri kaminuza.

Ibi bikiyongeraho kugira amasaha make yo guhura na mwarimu kubera uburyo bwo kwiga muri system ya modules aho umuntu agira umwanya munini wo kwiyigisha.
Iki kibazo kikaba gikomeje kwibazwa mu gihe umunyeshuri urangije muri kaminuza agorwa no kuba yakwandika ibaruwa isaba akazi, cyangwa yakora ikizamini cyo kuvuga akagorwa no kumva cyangwa gusubiza mu rurimi rw’icyongereza.
Bamwe bakaba bavuga ko iki kibazo cyashakirwa umuti mu batanga ubumenyi muri izo ndimi kandi bagahera mu mashuri yo hasi.

Ibi bikaba buhuzwa na gahunda Ambasaderi Dr Charles Murigande umuyobozi mukuru ushinzwe iterambere rya kaminuza y’u Rwanda aherutse gutangariza Kigali today, ko ubu abarimu ba kaminuza bagiye gukorerwa isuzumwa ngo harebwe urwego bariho mu bumenyi bw’icyongereza buri wese ahabwe seritifika "Certificate" y’urwego ariho. Uzaba agifite ibibazo mu rurimi rw’icyongereza, azakomeza gufashwa ahabwa amahugurwa kugeza akimenye neza.

Ibi bikaba ngo biri mu rwego rwo gufasha abarimu bajyaga bigisha nabo ururimi rw’icyongereza bataruzi cyangwa bakamurika inyandiko ku bikuta bakigisha mu Kinyarwanda.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo