Amerika iryamiye amajanja ku mvururu zishobora kuvuka nyuma y’amatora muri Kenya

Leta Zunze ubumwe za Amerika yahaye gasopo umuntu wese wahirahira ateza imvururu nyuma y’amatora ateganyijwe gusubirwamo mu kwezi gutaha mu gihugu cya Kenya nyuma y’uko urukiko rutesheje agaciro ibyari byavuye mu matora yabaye mu kwezi gushize ruvuga ko habayemo uburiganya.

Ibi byanatumye Leta ya Amerika ibuza abanyamerika kuzajya muri iki gihugu mu bihe by’aya matora ndetse na nyuma yayo kuko babona hashobora kuvuka imyigaragambyo ikaze ku barwanashyaka b’umukandida uzaba watsinzwe amatora. Gusa Leta ya Trump yavuze ko iryamiye amajanja mu guhosha izi mvururu mu gihe zaba zivutse.
Leta ya Amerika yatangaje ko ibona hashobora kuvuka imvururu nyuma y’aya matora y’umukuru w’igihugu cya Kenya bitewe nuko na nyuma y’amatora ya mbere abaturage bari batangiye kwirara mu mihanda bamaganira kure ibyari byatangajwe n’akanama gashinzwe amatora muri iki gihugu byaje no guteshwa agaciro n’urukiko rukuru rw’iki gihugu ruvuga ko habayemo uburiganya.

Nkuko ikinyamakuru TUKO.co.ke kibivuga, Leta ya Kenya nayo ikomeje gukora ibishoboka byose yitegura mu buryo bwose kugira ngo mu gihe izi mvururu zaba zibaye zizahoshwe mu maguru mashya ntawe zihitanye ndetse nta n’ibintu byangijwe.
Ibi byanatumye Leta ya Kenya iburira abaturage bayo kutazagira aho bajya mu bihe aya matora azaba yegereje ndetse na nyuma yayo kugira ngo batazagwa muri iyi myigaragambyo mu gihe yaba ibaye.
Biteganyijwe ko igihugu cya Kenya kizasubiramo amatora y’umukuru w’igihugu tariki ya 17 Ukwakira 2017 nyuma yuko ayabaye mbere ateshejwe agaciro n’urukiko rukuru ruvuga ko yabayemo uburiganya nkuko Raila Odinga yari yashyikirije ikirego cye uru rukiko arusaba ko yasubirwamo.

Gusa ngo aya matora aracyafite imbogamizi nyinshi kuko ngo kugeza ubu sosiyeti y’ikoranabuhanga y’abafaransa yatsindiye isoko ryo gukoresha aya matora ivuga ko ibona ku itariki iteganyijwe izaba itararangiza kwitegura.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo