Amerika ihangayikishijwe n’ubwicanyi bwakorewe abarundi muri RDC

Reta Zunze Ubumwe z’Amerika zivuga ko zihangayikishijwe n’amakuru y’ubwicanyi bwakorewe Impunzi z’Abarundi bikozwe n’inzego z’umutekano za Repubulika Iharanira Demokarasi ya Congo I Kamanyola mu burasirazuba bwa bw’iki gihugu.

Amerika yatangaje ibi mu nyandiko yashyizwe ahagaragara kuri wa gatatu itariki 20 Nzeri 2017. Muri iyi nyandiko Amerika ihamagarira Leta ya Congo gukorana n’ibiro bya ONU bishinzwe impunzi ku isi hamwe n’inteko zishinzwe kuzicungira umutekano muri iki gihugu bagakora ibishoboka byose kugira ngo umwuka mubi uri hagati y’impunzi z’abarundi n’Abanye-Congo urangire.

Amerika ivuga kandi ko icyatumye ubwo bwicanyi buba kizamenyekana kandi ababikoze bagashyikirizwa inkiko.
Amerika isaba Reta ya Kongo gucunga umutekano w’abaturage bayo kugira hatagira ibindi bitero byongera kuba kandi bagasaba ko abashinzwe umutekano muri Kongo kudakoresha ingufu z’umurengera.

Abarundi 34 bishwe barashwe abandi 124 bagakomereka mu Mujyi wa Kamanyola mu Burasirazuba bwa Repubulika Iharanira Demokarasi ya Congo ku wa Gatanu tariki 15 Nzeri 2017 ,gusa Leta ya Congo ivuga ko abarundi bishwe atari impunzi ahubwo ari abarwanyi b’umutwe w’inyeshyamba utazwi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo