Amerika igiye gukozanyaho na Afghanistan

Perezida wa Leta Zunze Ubumwe za Amerika,Donald Trump yatangaje ko ingabo z’igihugu cye zitakivuye muri Afghnanistan ahubwo ko agiye kurwana n’iki gihugu kandi yongeraho ko yizeye intsinzi.

Donald Trump yavuze ko gahunda yari afite ari iyo gukura ingabo ze muri Afghanistan ariko yisubiyeho ko agiye kurwana n’iki gihugu kubera iterabwoba ridasiba guhitana imbaga ku isi kandi akaba yizeye gutahukana intsinzi byanga bikunda cyane ko ngo we atazakora ikosa nk’iryo Barrack Obama yakoze muri Iraq.

Perezida wa Leta Zunze Ubumwe za Amerika kandi yavuze ko yari afite gahunda yo kudatera iki gihugu kugeza cyisubiyeho ariko akaba abona nta gahunda yo kureka ubushotoranyi bwa hato na hato hirya no hino ku isi mu bikorwa by’iterabwoba gusa yavuze ko nta gihe avuze iyi ntambara izabera bivuze ko isaha iyo ariyo yose twakumva ngo karabaye.

Ibi bibaye nyamara Donald Trump yari yahaye gasopo igihugu cya Afghanistan ariko gikomeza kuvunira ibiti mu matwi. Trump yari yijeje iki gihugu gukomeza gukorana neza ariko babyima amatwi.

Abatalibani nabo ntibiyumanganyije ahubwo bavuze ko mu gihe Trump yaba adakuye ingabo ze mu gihugu cya Afghanistan byamubera ingorane zikomeye bityo ibi biherekezwa n’ibaruwa bamwandikiye bamusaba gukurayo ingabo ze.

Trump kandi yihanangirije n’igihugu cya Pakistan yongeraho ko atazihanganira na gato uwo ari we wese uzahirahira agaragaraho ibikorwa by’iterabwoba.Yagize ati”Amerika ntisiba gutanga amamiliyoni y’amafaranga kugirango harwanywe iterabwoba ku isi ariko ibindi bihugu bikarushaho kubaka ibyo dushaka gusenya.

Asif Ghafoor,umuyobozi w’ingabo za Pakistan nyamara we yatangaje ko nta terabwoba rirangwa mu gihugu cye anongeraho ko yiteguye gukorana n’ingabo za Amerika mu gukomeza kurwanya iterabwoba aho ariho hose ku isi.

Jim Mattis, umunyamabanga w’ingabo za Amerika we yemeje ko bakomeje kongera umubare w’ingabo mu gihugu cya Pakistan bagenda begera igihugu cya Afghanistan bityo ngo mu gihe ibi bihugu bitaba byisubiyeho umuriro wake.

Umwe mu ngabo zikomeye z’Ubwongereza zicunga umutekano mu gihugu cya Afghanistan,Sir Michael Fallon nawe yavuze ko ashyigikiye icyemezo cya Amerika cyo kujya muri iki gihugu. Yagize ati “tubahaye ikaze ndetse yongeraho ko nabo bazaguma muri iki gihugu bagakomeza kugarura amahoro,umutekano,demokarasi ibereye abanyagihugu ndetse no kurwanya iterabwoba rirangwa muri iki gihugu cyane cyane mu burengerazuba bwacyo.

Gusa Donald Trump yahakanye ko nta zindi ngabo za Amerika ziri gutegurwa kujya muri Afghanistan nyamara hakaba hakekwa ko hari gutegurwa izindi ngabo 4000 nkuko John Nicholson,umugenerari ukomeye w’ingabo za Amerika we yabisabwaga.

Bongeyeho ko batatangaza umubare w’ingabo bazakoresha ko ibyo ari ibanga ryabo.
Trump yavuze kandi ko atazabura kurwanya yivuye inyuma imitwe y’iterabwoba irimo nka al-Qaeda na Leta yiyita iya kisilamu (Islamic State). Yagize ati “iyi mitwe ikwiye kumenya ko nta hantu na hamwe ingabo za Amerika zihishwa kandi ko nta na hamwe zitabasha kugera”.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo