Amaze imyaka 7 ari muri Koma kubera ikinya yatewe n’Ibitaro bya gisirikare I Kanombe

Umubyeyi witwa Dusabimana Mediatrice wabyariye mu bitaro bya Gisirikare I Kanombe mu mwaka wa 2010, amaze imyaka irindwi ari muri koma kubere ikinya yatewe cyamuhezemo kugeza ubu.

Umugabo we kimwe n’umuryango we bavuga ko bagannye inzego zose bireba ariko bakabura uwabafasha kuvuza uyu mubyeyi dore ko na Minisiteri y’ubuzima ntacyo yamumariye.

Ntahobavukira Alex atuye mu Mudugudu w’Iterambere,Akagari ka Nyaruyenwi mu Murenge wa Mageragere ho mu Karere ka Nyarugenge avuga ko tariki ya 9 Kanama 2010 aribwo umugore we Dusabimana Mediatrice yagannye Ibitaro bya Gisirikare I Kanombe agiye kubyara umwana wabo w’imfura.

Nyuma y’imyaka 7 abyaye uyu mwana ,ikinya yatewe na n’ubu cyamugumyemo ndetse ngo bikaba byaragize ingaruka zitandukanye ku muryango we nk’uko uyu mugabo abyivugira.

Ntahobavukira avuga ko yageregeje kugeza ikibazo cye haba ku Bitaro bya gisirikare ndetse no muri Minisiteri y’ubuzima ntiyahabwa igisubizo nyuma yaje kugana inkiko asaba ko umugore we yavurizwa hanze n’u Rwanda,urukiko rw’ikirenga rwaje gushyiraho Komisiyo y’abaganga batatu ngo bakurikirane iki kibazo ,batanga raporo ivuga ko uburwayi bw’uyu mugore budashobora gukira kuko yagize ikibazo ku bwonko ndetse n’urutirigongo .Gusa uyu mugabo avuga ko yababajwe no gucibwa amagarama y’urubanza hirengagijwe ikibazo afite.

Radio/TV1 dukesha iyi nkuru ivuga ko nyuma yo gusura Ntahobavukira tariki ya 18 z’uku kwezi bigoranye yaje kugera aho uyu mugore amaze imyaka 7 ari muri Koma mu bitaro bya Gisirikare I Kanombe aho yagerageje kuvugana n’ibitaro ariko biranga.

Ngo ku munsi ukurikiyeho Radio/TV1 yavugishije Minisiteri y’Ubuzima nayo iyisaba kuyiha iminsi ibiri yo gukusanya amakuru kuri iki kibazo.

Ngo nyuma y’iminsi 5 iki gitangazamakuru gihamagara muri Minisiteri y’Ubuzima ndetse cyakohereza ubutumwa bugufi ntibatange igisubizo nyacyo ,Umuvugizi w’iyi Minisiteri ,Kayumba Malik ku murongo wa Telefone yavuze ko yavuze ko iki kibazo atagisubiriza mu itangazamakuru.

Kugeza ubu umugabo w’uyu mugore avuga ko agorwa no gusobanurira umwana we ugeze mu mwaka wa mbere w’amashuri abanza uburyo nyina arwayemo, wumvise neza kandi inzira Minisiteri y’Ubuzima isaba uyu mugabo kuyigana ntiwabura kwibaza no ku gihe bishobora kuzatwara dore ko hashize imyaka 7 iki kibazo kizwi ariko nta gisubizo nyacyo giha icyiwere uyu muryango.

Gabriel Habineza/Umubavu.com



Tanga igitekerezo kuri iyi nkuru



Igitekerezo