Amashirakinyoma ku itabwa muri yombi rya Diane Rwigara n’umuryango we

Umuvugizi wa polisi y’ u Rwanda ACP Theos Badege yahakanye amakuru avuga ko Diane Rwigara n’ umuryango we batawe muri yombi avuga ko barimo gukorwaho iperereza kubyaha bakurikiranyweho.

Mu gitondo cyo kuri uyu wa Gatatu tariki 30 Kanama 2017 Ijwi ry’ Amerika ryatangaje inkuru ivuga ko Diane rwigara n’ umuryango we wose bari mu maboko ya polisi.

Aya makuru ACP Theos Badege yayahakanye avuga ko batatawe muri yombi gusa avuga ko barimo gukorwaho iperereza ry’ ibanze ku byuaha bakurikiranyweho.

Yagize ati “Diane Rwigara ntabwo afunzwe. Icyo Polisi yakoze ejo, mu kazi kayo ko gukora amaperereza y’ibanze mu gihe hagaragaye ibimenyetso biganisha ku cyaha, ni uko ejo hakozwe gusakwa hashakwa ibimenyetso by’ibyo byaha. Icya mbere ni ugukoresha inyandiko mpimbano ikindi ni ukunyereza imisoro. Icya mbere kirajya kuri Diane Rwigara ikindi kikajya ku ikompanyi y’umuryango n’abayifitemo ubuyobozi.”

ACP Badege yakomeje avuga ko icyakozwe ari ugusaka nk’uko Polisi y’Igihugu ibiherwa ububasha n’amategeko hagamijwe gushaka ibimenyetso by’ibyaha.

Ati “ Inyandiko mpimbano ni igihe yahimbaga imikono ashakisha umubare yasabwaga na Komisiyo y’Igihugu y’Amatora. Ikindi ni ibijyanye no kunyereza imisoro, mu iperereza duhuriyeho n’Ikigo cy’Imisoro n’Amahoro, kandi nabo [Umuryango wa Rwigara] barabizi hari n’ibyo biyemereye muri RRA.”

Musaza wa Diane Rwigara witwa Aristide Rwigara kuri ubu ubarizwa muri Leta Zunze Ubumwe za Amerika yari yabwiye umunyamakuru wa RFI, Sonia Rolley ko bashobora kuba bafunzwe ndetse ko atewe impungenge n’umutekano w’abantu 5 bo mu muryango we atazi aho baherereye kuko ngo telefone zabo zidacamo ndetse na Whatsapp zabo zikaba zakuwe mu murongo.

Diane Rwigara yari yatanze kandidatire ku mwanya wa Perezida wa Repubulika mu matora y’ umukuru w’ u Rwanda aheruka, gusa ntabwo yemerewe kwiyamamaza ku mpamvu komisiyo y’ igihugu y’amatora ivuga ko ari uko atari yujuje bimwe mu byasabwaga.

Ku mugoroba wo ku wa Gatanu tariki 7 Nyakanga, Komisiyo y’Amatora (NEC) nibwo yemeje ko Perezida Paul Kagame wari umukandida wa FPR Inkotanyi, Dr. Habineza Frank wa Democratic Green Party na Mpayimana Philippe wigenga, aribo bazahatana mu matora ya Perezida wa Repubulika yabaye ku wa 3 no ku wa 4 Kanama 2017.

Barafinda Sekikubo Fred, Shima Diane Rwigara na Mwenedata Gilbert ntibemerewe ku mpamvu zirimo gutanga imikono irimo iy’abapfuye.

NEC yatangaje ko Diane Rwigara ku ilisiti y’abamusinyiye hariho abantu bapfuye aribo ; Rudahara Augustin wari ufite nimero y’indangamuntu 1196380003823002, waguye mu bitaro bya Kibagabaga tariki ya 16 Mata 2016, agashyingurwa tariki ya 17 Mata 2016, Maniraguha Innocent wari ufite nimero y’Indangamuntu 1199898000414103 na Byiringiro Desire ufite nimero y’indangamuntu 119780002226035.

Yavuze kandi ko Diane Rwigara afatanyije n’umukorerabushake wa Komisiyo y’Igihugu y’Amatora mu Karere ka Rulindo, biganye imikono y’abantu bagasinyira abagera kuri 26 imyirondoro yabo ikuwe ku makarita y’itora uwo mukorerabushake yari afite.



Tanga igitekerezo kuri iyi nkuru



Igitekerezo