Afurika y’Epfo : Abakozi bigabye mu mihanda bamagana ruswa

Ihuriro ry’amashirahamwe y’abakozi muri Afurika y’Epfo Cosatu ryahamagaje ihagarikwa ry’akazi ku bakozi bose mu kwamagana ruswa muri iki gihugu.

Ku munsi wa mbere, byari byitezwe ko haba ihagarikwa ry’akazi inshuro 13 mu duce dukomeye nka Johannesburg, Cape Town na Durban ubwo amashyirahamwe y’abakozi yatangiye kwiyegeraniriza hamwe ngo yigabe mu mihanda yamagana ruswa ikomeza kuvuza ubuhuha muri iki gihugu.
Umunyamabanga mukuru wa sendika Cosatu, yari yabwiye abanyamamakuru ko iyi myigaragambyo izaba ikomeye kuruta iyagiye iba mbere. Yagize ati "Dukoresheje guhagarika akazi mu guha ubutumwa Leta ndetse n’abikorera ku giti cyabo ko turambiwe ruswa ziribwa mu gihugu cyacu".
Iryo hagarikwa ry’akazi rikaba ryari rishyigikiwe n’ishyaka rya ANC risanzwe ari irya kabiri ku riri ku butegetsi SACP. Biravugwa kandi ko abagiye muri iyi myigaragambyo banasabaga ko Perezida Zuma arekura ubutegetsi.
Cosatu yari isanzwe ishyigikiye Perezida Zuma ariko ubu iri inyuma y’umwungirije ari we Cyril Ramaphosa nawe uryamiye amajanja mu kuba umukuru w’igihugu. Uyu akaba ahanganye na Dlamini Nkosazana wahoze ayoboye ishyirahamwe ry’ubumwe bwa Afurika kandi bikaba bisanzwe binagaragara ko ari we Zuma ashaka ko azamusimbura ku mwanya wo kuyobora igihugu cya Afurika y’Epfo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo